آیتِ سجدہ کے بعد رکوع کر لینے سے سجدۂ تلاوت کا ادا ہو جانا

محترم مفتی صاحب !السلام علیکم ورحمۃ اللہ وبرکاتہ!
گذارش ہے کہ ہمارے علاقےمیں مسجد عثمانیہ کے پیش امام و حافظ صاحب جو کہ بڑے قابلِ احترام ہیں، گذشتہ کئی سالوں سے تراویح پڑھاتے چلے آ رہے ہیں ، لیکن اس سال انہوں نے پندرھویں پارے سے لیکر اُنتیسویں پارے کے درمیان جتنے بھی سجود تلاوت ہیں وہ باقاعدہ ادا نہیں کیے، لوگوں کے اصرار کرنے پر انہوں نے بیان فرمایا کہ دین میں سہولت موجود ہے کہ سجدۂ تلاوت کے وقت رکوع کر لینے سے سجدہ تلاوت ادا ہو جاتا ہے، جن لوگوں کو اعتراض ہے تو اصرار کرنے کے بجائے دلیل بمعہ حوالہ اور صفحہ نمبر کے لائیں۔
حضرت یہ ہم مقتدیوں کے لیے جدید ترین معلومات ہے کہ سجدۂ تلاوت کی جگہ وقف کر کے رکوع کر لیا جائے تو سجدہ تلاوت ادا ہوجاتا ہے ، براہِ کرم ہماری راہ نمائی فرمائیں اور اس مسئلہ پر دین کی روشنی میں باقاعدہ فتویٰ صادر فرمائیں ، آپ کی عین نوازش ہوگی۔

الجوابُ حامِدا ًو مُصلیِّا ً

جی ہاں! آیتِ سجدہ پڑھنے کے فوراً بعد رکوع میں سجدہ تلاوت کی نیت سے یہ سجدہ شرعاً ادا ہو جاتا ہے، جبکہ اس کے بعد نماز کے سجدہ میں بغیر نیت کے بھی مقتدیوں کی طرف سے بھی سجدہ تلاوت ادا ہو جاتا ہے اور یہ ہماری کتابوں میں صراحۃً موجود ہے، اس لیے بلاوجہ پریشان ہونے کی ضرورت نہیں اور اس سلسلہ میں عام عوام کو معلوم نہ ہونا کوئی اچھنبے کی بات نہیں، تاہم امام موصوف کو چاہیے کہ اس طریقہ کار کو معمول بنانے سے احتراز کریں۔

مأخَذُ الفَتوی

ففی الفتاوى الهندية: أجمعوا على أن سجدة التلاوة تتأدى بسجدة الصلاة وإن لم ينو للتلاوة، كذا في الخلاصة. (1/ 134)۔
و فی الدر المختار: نعم لو ركع و سجد لها فورا ناب بلا نية اھ(2/ 112)۔
و فی حاشية ابن عابدين: (قوله لو ركع و سجد لها) أي للصلاة فورا ناب أي سجود المقتدي عن سجود التلاوة بلا نية تبعا لسجود إمامه لما مر آنفا أنها تؤدى بسجود الصلاة فورا و إن لم ينو اھ(2/ 112)۔