رسول اللہؐ کا خواب میں کہنا کہ ’’فلاں درست ہے، لیکن اس سے کہیں کہ اپنا عقیدہ درست کرے‘‘

کیا فرماتے ہیں علماءِ کرام و مفتیانِ عظام اس مسئلہ کے بارے میں ، کہ میرے ایک عزیز کا کہنا ہے کہ اس نے حضرت محمد صلی اللہ علیہ و سلم کو خواب میں دیکھا ، ان کو میرے بارے میں بتایا کہ عمران ( میں) صحیح ہے ، لیکن اس سے کہیں کہ اپنا عقیدہ درست کرلے۔
میں دیوبندی ہوں اور میرے عزیز سیفی ہیں ، عمومی طور پر ، وہ بہت ایماندار اور تواتر سے نماز ادا کرنےوالا شخص ہے ، یہاں ہمارے گاؤں میں سیفی ( غالباً سلفی لکھا جاتا ہے) ہوتے ہیں بڑی تعداد میں ، وہ درست مسلمان ہیں اور ان کا ایک خلیفہ ، ان سے درست راستے پر قائم رہنے کا کہتا ہے ، وہ ذکر مخفی میں ہوتے ہیں۔
کیا زیارتِ نبی خواب میں درست ہے ؟ کیا اس کا کوئی ثبوت ہے؟ کیا کسی صحابی ، یا صوفی نے حضورﷺ کو خواب میں دیکھا ؟

الجوابُ حامِدا ًو مُصلیِّا ً

حضور صلی اللہ علیہ و سلم کا خواب میں نظر آنا ، اگر چہ ثابت اور درست ہےاور صحابہ کرام و صوفیائے عظام کے علاوہ عوام ، بلکہ کفار تک سے متحقق ہوا ہے ، مگر کسی صحیح العقیدہ شخص کو اس قسم کا خواب سنا کر اُسے صحیح عقیدہ اختیار کرنے کی دعوت دینا ، اور اس صحیح العقیدہ سے ، اپنے ہی عقائد مراد لینا ، بددیانتی اور گمراہ کرنے کی خطرناک سازش کا حصہ ہے ، اس سے بچنے اور اہلِ حق علماء سے رابطہ کی شدید ضرورت ہے۔

مأخَذُ الفَتوی

ففی صحيح البخاري : عن أبي هريرة عن النبي - صلى الله عليه وسلم - قال: ’’تسموا باسمي و لا تكتنوا بكنيتي ، و من رآني في المنام فقد رآني ، فإن الشيطان لا يتمثل في صورتي ، و من كذب علي متعمدا فليتبوأ مقعده من النار‘‘ اھ(1/ 33)۔
و فی صحيح البخاري : أن أبا هريرة ، قال : سمعت النبي - صلى الله عليه و سلم - يقول : «من رآني في المنام فسيراني في اليقظة ، و لا يتمثل الشيطان بي اھ(9/ 33)۔
و فی صحيح البخاري : عن أنس - رضي الله عنه -، قال : قال النبي - صلى الله عليه وسلم -: «من رآني في المنام فقد رآني ، فإن الشيطان لا يتخيل بي ، و رؤيا المؤمن جزء من ستة و أربعين جزءا من النبوة اھ(9/ 33)۔
و فی رد المحتار : و استشكل إثباته بالرؤيا بأن رؤيا غير الأنبياء لا ينبني عليها حكم شرعي الخ (1/ 383)۔