مقروض و محتاج آدمی کا کسی سرکاری ذمہ دار کےواسطہ سے ، سرکاری خزانے سے رقم لیکر قرض ادا کرنا

کیا فرماتے ہیں علماءِ کرام ومفتیانِ عظام مندرجہ ذیل مسئلہ کے بارے میں کہ :
(۱) ایک گاؤں میں ، بجلی بغیر میٹر کے ، صوبائی وزیر نے یا ایس۔ ڈی۔ او۔ نے ووٹ حاصل کرنے کیلئے سال بھر لگائی ، حالانکہ یہ قومی خزانہ ہے ، دو ،تین سال سے بغیر میٹر کے بجلی چل رہی ہے ، اب معلوم یہ کرنا ہے کہ یہ جائز ہے یا کہ نہیں؟
(۲) ایک آدمی پرقرض ہے ، وہ اس کو ادا نہیں کرسکتا غربت کی وجہ سے، اگر وہ کسی محکمے والے سے یا M.P.A والے سے ملے اور حکومت کے خزانے سے یہ رقم لے کر ادا کرلے ، کیا یہ رقم اس کے لئے جائز ہے یا نہیں؟

الجوابُ حامِدا ًو مُصلیِّا ً

(۱) صورتِ مسئولہ میں ، مذکور حضرات نے اگر حکومت کی اجازت سے بجلی کی لائنیں جاری کی ہیں تب تو اس کا استعمال کرنا جائز اور درست ہے ، اور اگر انہوں نے حکومت کی اجازت کے بغیر یہ ترتیب قائم کی ہو ، تو اس سے وہ سخت گناہ گار ہوۓ ہیں ، ان پر لازم ہے کہ فوراً اپنے اس ناجائز فعل سے توبہ واستغفار کریں اور جن جن لوگوں کو ناجائز طریقہ سے اور جعلی لائنیں دی ہیں ، ان سے سرکاری نرخ کے مطابق اس پورے عرصہ کا بل وصول کرکے سرکاری خزانہ میں جمع کرائیں۔
اسی طرح جن لوگوں نے یہ ناجائز بجلی استعمال کی ہے ، ان پر بھی لازم ہے کہ اپنے اس فعل پر توبہ واستغفار کریں اور اب تک جتنا عرصہ ناجائز بجلی استعمال کی ہے ، اس کی پوری تحقیق کرکے اس کا بل سرکاری خزانہ میں جمع کرائیں، اور آئندہ کے لئے اس قسم کے فعل سے مکمل اجتناب کریں۔
لا یحل مال امرء الا بطیب نفس منہ۔ (مشکوٰۃ)۔
(۲) اگر کوئی M.P.A یا دوسرا کوئی سرکاری شخص حکومت کے غریبوں ، مسکینوں وغیرہ کی مدد کیلئے مقرر کردہ فنڈ سے کچھ رقم نکلواکر کسی غریب مسکین کی مدد کردے یا کسی کا قرض دلوادے ، تو یہ جائز اور درست ہے، اور اگر حکومت نے ایسے شخص کو رفاہی امور وغیرہ کیلئے کچھ رقم وغیرہ دی ہو ، تو اس رقم سے کسی غریب مسکین کو دینا یا کسی کا قرض دلوانا درست نہیں ، اس سے احتراز کرنا ضروری ہے۔