ایک ہی مقام کے مختصر وطویل راستوں میں سے مختصر راستہ اختیار کرنے والا مسافر شمار ہوگا یا نہیں؟

حضرت مفتی صاحب! سفر میں قصر و اتمام سے متعلق ایک مسئلہ سمجھ نہیں آ رہا ہے اُمید ہے کہ تفصیلی وضاحت فرما کر مطمئن فرمائیں گے ، علماء سے سنا ہے کہ اڑتالیس(۴۸) میل سفر کا ارادہ کر کے شہر سےنکلنے پر آدمی مسافر ہو جاتا ہے اور اس پر سفر کے احکام لاگو ہو جاتے ہیں، ہمارے کچھ رشتہ دار کسی جگہ میں رہتے ہیں، ان کے گاؤں جانے کے لۓ دو راستے ہیں، ایک پرانا راستہ ہے جو بہت ٹوٹا پھوٹا ہے اور انتہائی خراب ہے اور دوسرا راستہ ابھی نیا بنا ہے جو پکی سڑک ہے، اور چونکہ دوسرے راستہ میں کافی آسانی ہوتی ہے، اس لۓ ابھی اس گاؤں کی آمدورفت کے لۓ لوگ یہی راستہ استعمال کرتے ہیں، یہاں مسئلہ یہ پوچھنا ہےکہ پہلا والا راستہ مذکور گاؤں کو سیدھا نکلا ہے اور اس راستہ پر ۴۸ میل کا فاصلہ نہیں بنتا، جبکہ دوسرے نئے راستہ پر چلتے ہوئے ۴۸ میل سے کہیں زیادہ فاصلہ بن جاتا ہے تو اس صورت میں اس نئے راستہ پر چلتے ہوئے اس گاؤں میں کوئی جاتا ہے تو وہ مسافر شمار ہوگا یا نہیں؟

الجوابُ حامِدا ًو مُصلیِّا ً

جو شخص لمبا راستہ طے کر کے وہاں پہنچےگا وہ شرعاً مسافر ہے اور قصر اس پر لازم ہے، ورنہ نہیں۔

مأخَذُ الفَتوی

فی البحر: قال وفی فتاوی قاضیخان الرجل إذا قصد بلدة و الی مقصده طریقان أحدهما مسیرة ثلاثة أیام ولیالیها والآخر دونها فسلك الطریق الابعد کان مسافرا عندنا وإن سلك الاقصر یتم اھ (۲/۱۲۹)۔
وفی الدر المختار: ولو لموضع طريقان أحدهما مدة السفر والآخر أقل قصر في الأول لا الثاني. (2/ 123)۔