پاکستان اور دیگر ممالک سےدرآمد گوشت کی خرید و فروخت اور اس کے استعمال کا حکم

السلام علیکم!
ہمارے یہاں عمان میں چکن اور مٹن برازیل ، آسٹریلیا، نیوزی لینڈ، انڈیا اور پاکستان سے آتا ہے ؟ ان پر حلال لکھا ہوتا ہے اور حکومت بھی یہ دعویٰ کرتی ہے کہ وہ فیکٹری کا دورہ کرتے ہیں تاکہ معلوم کریں کہ یہ حلال ہے یا نہیں؟ عام طور پر کمپنی کسی تیسرے فریق سے سر ٹیکیٹ بھی لیتی ہے کہ یہ حلال ہے۔ ہمارے پاس اس بات کی تصدیق کرنے کا کوئی طریقہ نہیں ہے کہ یہ حلال ہے یا نہیں ؟ مقامی چکن بھی دستیاب ہے لیکن ریستوران عام طور پر درآمد شدہ کو استعمال کرتے ہیں کیونکہ یہ سستا ہے ؟ کیا اس صورت میں ہمارے لئے ان ریستورانوں میں کھانا کھانا جائز ہوگا؟

الجوابُ حامِدا ًو مُصلیِّا ً

مذکورہ ممالک میں سے پاکستان چونکہ ایک اسلامی ملک ہے ، لہذا پاکستان سے درآمد شدہ گوشت کی خرید و فروخت اور اس کا استعمال شرعاً درست ہے ، البتہ پاکستان کے علاوہ دیگر ممالک کے گوشت سے متعلق تفصیل یہ ہے کہ ان ممالک میں چونکہ عام طور پر شرعی ذبیحہ کا اہتمام نہیں کیا جاتا، اور گوشت میں اصل حرمت ہے ، اس لئے جب تک ان ممالک کے گوشت کے حلال ہونے کا یقین یا غالب گمان نہ ہو جائے ، اس کا استعمال اور خرید و فروخت شرعاً جائز نہیں، تاہم اگر کوئی معتبر و مستند حلال سرٹیفکیشن باڈی یا ذمہ دار اور دیانت دار افراد اس کے حلال ہونے کی تصدیق کر دیں، تو ایسی صورت میں ان کی اس تصدیق کا اعتبار کرتے ہوئے ایسے گوشت کو استعمال کیا جاسکتا ہے ، بصورتِ دیگر مقامی حلال ذبیحہ کو ہی ترجیح دی جائے۔

مأخَذُ الفَتوی

كما في بحوث في قضايا فقهية معاصرة: حكم ذبائح أهل الكتاب: الذي أعتقده وأدين الله تعالى عليه أن مجرد كون الذابح من أهل الكتاب لا يجعل الذبيحة حلالا، حتى يسمى الله تعالى عليه، ويفري الأوداج بطريق شرعي، كما أن مجرد كون الذابح مسلما، لايذكي الذبيحة، حتى يستوفي جميع شرائط الزكاة الشرعية، وإنما أحل الإسلام ذبائح أهل الكتاب دون من سواهم من المشركين؛ لأن أهل الكتاب كانوا ملتزمين بشروط الزكاة الإسلامية. وعلى هذا الأساس، لا تحل ذبائح أهل الكتاب إلا بهذه الشروط، وبما أن معظم النصارى قد تركوا اليوم الالتزام بشروط الزكاة التي هي واجبة في أصل دينهم فإن ذبائحهم لا تحل للمسلمين إلا إذا تحقق أنهم قد استوفوا هذه الشروط. (ص: 345)۔