اللہ تعالی سے وعدہ اور عہد کرنا قسم شمار ہوگا؟

السلام علیکم ورحمۃ اللہ وبرکاتہ! مفتی صاحب ایک آدمی نے کہا کہ اے اللہ میں تم سے وعدہ اور عہد کرتا ہوں کہ فلاں کام نہیں کروں گا، اس کے باوجود وہ آدمی وہ کام کر لیتا ہے تو اس صورت میں بندے پر کیا کفارہ ہوگا؟

الجوابُ حامِدا ًو مُصلیِّا ً

سوال میں مذکور الفاظ ’’ اے اللہ میں تم سے وعدہ اور عہد کرتا ہوں کہ فلاں کام نہیں کروں گا‘‘ چونکہ قسم کے الفاظ نہیں، اس لیے یہ الفاظ کہنے کے بعد متعلقہ کام کرنے کی وجہ سے شخص مذکور پر کوئی کفارہ تو لازم نہ ہوگا، تاہم اللہ تعالیٰ سے مذکور کام کے نہ کرنے کا عہد و پیمان کرنے کے بعد اس کام کو کر لینا گناہ کی بات ہے، جس پر مذکور شخص کو توبہ واستغفار اور آئندہ کے لیے اس کام سے اجتناب لاز م ہے۔

مأخَذُ الفَتوی

قال اللہ تعالیٰ: ﴿یٰأیھا الذین اٰمنوا أوفوا بالعقود﴾ الآیۃ
کما فی الھندیۃ: ولو قال: بصفۃ اللہ لا أفعل کذا لا یکون یمینا، ولو قال: وعلم اللہ لا أفعل کذا عندنا لا یکون یمینا، ولو قال: ورحمۃ اللہ لا أفعل کذا لا یکون یمینا فی قول أبی حنیفۃ و محمد رحمھما اللہ تعالیٰ.
وفیہ ایضًا: ولو قال: شھد اللہ أنہ لا إلٰہ إلا ھو لا یکون یمینا کذا فی الخلاصة. (ج٢، ص٥٤) واللہ اعلم بالصواب