سورت کے درمیان سےتلاوت شروع کرتے وقت "بسم اللّٰہ "پڑھنا جائز ہے ؟

قرآن میں جو یہ آیت ہے”إذَا قَرَأْتَ الْقُرْآنَ فَاسْتَعِذْ بِاللهِ مِنَ الشَّيْطَانِ الرَّجِیْمِ“ اس میں تلاوت سے پہلے”تعوذ“ پڑھنے کی تلقین ہے، میرا سوال یہ ہے کہ جب ہم قرآن کی کسی سورت کے بیچ میں سے تلاوت شروع کرتے ہیں تو پہلے”تعوذ“ پڑھتے ہیں، پھر ”بسم اللہ الرحمن الرحیم“ پڑھتے ہیں، تو کیا قرآن کی سورت کے بیچ میں”بسم اللہ“ پڑھنا غلط ہے؟ کیا اس میں کوئی گناہ یا بدعت کا پہلو تو نہیں؟ میں نے عرب کے قاریوں کو ایسا کرتے دیکھا ہے، یعنی جب وہ سورت کے بیچ سے تلاوت کرتے ہیں تو صرف،”تعوذ“پڑھتے ہیں،” بسم اللہ“ نہیں پڑھتے، وہ صرف سورت کے شروع میں ہی”بسم اللہ “ پڑھتے ہیں۔

الجوابُ حامِدا ًو مُصلیِّا ً

سوال میں مذکور آیت کا تعلق ابتداءِ تلاوت کے ساتھ ہے، چاہے سورت کی ابتداء سے شروع کرے یا درمیان سے ، جبکہ ”بسم اللہ “ پڑھنے کا بھی یہی حکم ہے کہ اس کا پڑھنا مسنون ہے، البتہ تلاوت کرتے کرتے اگر درمیان میں انقطاع آجائے، اور دوبارہ سے شروع کر کے آگے بڑھنا ہو، توصرف ”أعوذ باللہ“ کافی ہے، اور اگر ”بسم اللہ “ بھی پڑھ لی جائے تو اس کی بھی گنجائش ہے۔

مأخَذُ الفَتوی

كما في القراءات روايتا ورش وحفص: البسملة واجبة فی أول كل سورة، سوى سورة براءة (التوبة)، وللقارئ الخيار فی وسط السورة، إن شاء بسمل وإن شاء ترك البسملة، والأفضل أن يبسمل تبركا بها. قال رسول الله صلى الله عليه وسلم (كل كلام أو أمر ذي بال لا يفتح بذكر الله عز وجل فهو أبتر أو قال أقطع)۔اهـ (166/1)
وفي شرح طيبة النشر لابن الجزري: قوله: (ووسطا) أي وسط السورة: يعنى ألفاظها وأجزاءها، هذا الموضع الثالث وهو أوساط السورة؛ فالقارئ فیه مخير بين الإتيان بالبسملة فیه بعد الاستعاذة، وذلك سوى براءة فإنه يحتمل التخيير فیها كغيرها، ويحتمل المنع من البسملة فیها. وقد اختلف رأي أصحابنا فی ذلك كما بينه فی النشر قوله: (خير) أي بين البسملة وعدمها۔ اھ (ص:48)