الکحل ملا پرفیوم لگا کر نماز پڑھنے کا حکم

کیا پرفیوم لگاکر نماز پڑھ سکتے ہیں؟ کچھ لوگ کہتے ہیں کہ اس میں الکحل ہوتا ہے اور وہ ناپاک ہے اس لئے نماز نہیں پڑھ سکتے، لیکن کچھ دوسرے لوگ کہتے ہیں کہ پرفیوم میں ملایا جانے والا الکحل یہ ایک کیمیکل ہے اور اس میں نشہ نہیں ہوتا، لہٰذا نماز جائز ہے اس بارے میں صحیح فتویٰ کیا ہے؟ جزاکم اللہ

الجوابُ حامِدا ًو مُصلیِّا ً

آج کل پرفیوم میں جو الکحل ملائی جارہی ہے وہ عموماً انگور اور کھجور کے علاوہ دیگر اشیاء مثلاً گندم، جَو اور دیگر سبزیوں سے کشیدہ ہوتی ہے اور ایسی الکحل کا استعمال مختلف فیہ ہے اس لئے اس قسم کی فریوم کا استعمال مطلقاً ناجائز و حرام نہیں بلکہ استعمال کی گنجائش ہے اور ایسا پرفیوم لگاکر نماز ادا کرنا بھی جائز اور درست ہے البتہ ایسے پرفیوم کے استعمال سے احتراز بہتر ہے تاہم اگر تحقیق سے یہ معلوم ہوجائے کہ پرفیوم میں ملائی جانے والی الکحل انگور اور کھجور سے بنائی گئی ہے اور کسی کیمیاوی عمل سے اس کی ماہیت کو تبدیل بھی نہ کیا گیا ہو تو ایسی پرفیوم بلاشبہ ناپاک ہے اس کا داخلی اور خارجی استعمال شرعاً جائز نہیں جس سے احتراز لازم ہے۔

مأخَذُ الفَتوی

فی تكمله فتح الملهم: وإن معظم الكحول التی تستعمل الیوم فی الأدویة والعطور وغیرها لا تتخذ من العنب أو التمر، إنما تتخذ من الحبوب أو القشور أو البترول وغیره، (الی قوله) وحینئذ هناك نسخة فی الأخذ بقول أبی حنفیة عند عموم البلوی. الخ (ج۳، ص۶۰۸)