اگر غیر مسلم کسی مسلمان پر احسان کرےتو اسے کیا بدلہ دیا جائے گا؟

مجھے ایک ضروری بات معلوم کرنی ہے، میں سرلنکا میں رہتا ہوں،لیکن امیگریشن کے مطابق نیشنلٹی ملنے تک میں کام نہیں کرسکتا، یہاں ایک عیسائی خاتون ہے ، انکی عمر تقریباً 70 سال ہے، وہ میرا پورا خیال رکھتی ہے، کھانے پینے سے لیکر گھر کا رینٹ تک، یہ جانتے ہوئے کہ میں ایک مسلمان ہوں، میں انکو اپنی ماں کی طرح سمجھتا ہوں، اور وہ بھی مجھے اپنے بیٹے کی طرح پیار کرتی ہے، بہت شریف پردہ کرنے والی اور اپنے عیسائی عقیدے کے مطابق عبادت کرنے والی خاتون ہے، ہمارے پیارے نبی پاک ﷺ تو محسن انسانیت ہیں، میرا سوال یہ ہے کہ کیا اس خاتون کی رحم دلی ، شفقت اور مصیبت میں ایک مسلمان کے کام آنا ، کیا آخرت میں انکی بخشش ہوجائے گی؟

الجوابُ حامِدا ًو مُصلیِّا ً

کفر سے بڑھ کر کوئی برائی نہیں، اور اس کے ہوتے ہوئے آخرت میں کوئی نیکی کار آمد نہیں، اور نہ ہی اس حالت میں دنیا سے جانے کی صورت میں بخشش ہوتی ہے، اس لئے سائل کو چاہیئے کہ اسکی نیکی کاصلہ دیتے ہوئے اس کو ایمان کی دعوت دے، تاکہ وہ محسن انسانیت کی نبوت سے مستفید ہونے کی اہل ہو۔

مأخَذُ الفَتوی

کما فی شرح فقہ الاکبر: لایقال ان قولہ تعالٰی: "فمن یعمل مثقال ذرۃ خیرا یرہ" یفید ان من عمل صالحا واتی خیرا ثم مات کافرا یری جزائ ذلک الخیر، وھو باطل بالاجماع۔ لانا نقول: ان معناہ یرہ فی الدنیا لیرد الاخرۃ ولا خیر لہ، (الی قولہ) وقال ابن عباس رضی اللہ عنہ : لیس مؤمن ولا کافر عمل خیرا او شرا، الا اراہ اللہ ایاہ ، فاما المؤمن فیغفرلہ سیئاتہ ویثیبہ بحسناتہ، و اما الکافر فترد حسناتہ ویعذب بسیئاتہ الخ (صـ157 )۔
واللہ اعلم بالصواب