اشاعت التوحید و السنۃ کا تعلق علماء دیوبند سے ہے یا نہیں؟

میں مماتی فرقہ کے بارے میں جاننا چاہتا ہوں کہ یہ دیوبندی ہیں یا نہیں ؟اور ہمیں ’’اشاعت التوحید والسنہ‘‘ جماعت کے بارے میں بھی آگاہ کریں کہ ان کا تعلق علماءدیوبند کے ساتھ ہے یا نہیں؟ مماتی امام کےپیچھے نماز پڑھنا درست ہے یاغلط؟

الجوابُ حامِدا ًو مُصلیِّا ً

اگر چہ مجموعی طور پر ’’ جماعت اشاعت التوحید و السنۃ‘‘ علماءدیوبند سے منسلک شمار ہوتی ہے ،مگر اپنے بعض عقائد ونظریات میں عقائد اھل السنۃ والجماعت کے اجماعی عقیدوں کے خلاف نظریات رکھنے کی بناء پر راہ اعتدال سے ہٹی ہوئی ہے ،خاص کر یہ لو گ "حیات النبیﷺ" کے منکر ہیں ۔حالانکہ اہل سنت والجماعت کا عقیدہ ہے کہ نبی کریم ﷺاپنے روضہ اطہر میں حیات ہیں اور آپ ﷺ کی یہ حیا ت مثلِ حیات دنیوی، بلکہ اس سے بھی اعلیٰ وارفع ہے ۔اس لیے احادیث مبارکہ کی رو سے جو شخص روضہ اطہر کے پاس آپ علیہ السلام پر درود پڑھتا ہے تو آپ علیہ السلام اس کو بذات خود سنتے ہیں اور جواب بھی دیتے ہیں ۔اور جو شخص دور سے درود پڑھتا ہے تو اللہ رب العزت فرشتوں کے ذریعے آپ علیہ السلام تک پہنچادیتے ہیں ۔ اور جو شخص اس کے خلاف عقیدہ رکھے،وہ اہل سنت والجماعت سے خارج اور بدعتی ہے ۔جس کے پیچھے نماز پڑھنا مکروہ ہے ۔
مزید تفصیل کیلیے (تسکین الصدور صفحہ نمبر219تا 342)مؤلفہ شیخ الحدیث حضرت مولانا سرفراز خان صفدر رحمہ اللہ تعالیٰ اور (المہند علی المفند السوال الخامس)مؤلفہ فخر المحدیثین حضرت مولانا خلیل احمد سہارنپوری قدس اللہ سرہ کا مطالعہ مفید رہےگا ۔واللہ اعلم بالصواب!