علماءِ دیوبند کی طرف ،اللہ تعالی سے متعلق عقیدۂ کذب کی نسبت کی وضاحت اور حقیقت

مفتی صاحب! آپ مجھے یہ بتائیں کہ کچھ بھائیوں نے ہمیں بتایا ہے کہ علماءِ دیوبند ، ہندوستان عقیدۂ کذب پر ایمان رکھتے ہیں اللہ عز وجل کی قدرت کے بارے میں ، کیا آپ ان کی وضاحت کر سکتے ہیں؟

الجوابُ حامِدا ًو مُصلیِّا ً

ذاتِ پاک حق تعالیٰ جل جلالہ کی ، پاک اور منزہ ہے اس سے کہ متصف بصفت کذب کی جاوے، معاذ اللہ تعالیٰ، اس کے کلام میں ہرگز ہرگز شائبہ کذب کا نہیں، قال اللہ تعالیٰ : ﴿ومن اصدق من اللہ قیلا﴾ (اللہ سے زیادہ سچا کون ہے) جو شخص حق تعالیٰ کی نسبت یہ عقیدہ رکھے، کہ وہ جھوٹ بولتاہے، وہ قطعاً کافر ہے، ملعون ہےاور مخالف قرآن اور حدیث اور اجماعِ امت کا ہے، وہ ہرگز مومن نہیں، البتہ یہ عقیدہ اہل ایمان سب کا ہے کہ خدائے تعالیٰ نے مثل فرعون و ہامان و ابی لہب کو قرآن میں جہنمی ہونے کا ارشاد فرمایا ہے، وہ حکمِ قطعی ہے، اس کے خلاف ہرگز ہرگز نہ کرےگا، مگر وہ اللہ تعالیٰ قادر ہے اس بات پر کہ ان کو جنت دے دیوے ، عاجز نہیں ہوگیا، قادرہے، اگر چہ ایسا اپنے اختیار سے نہیں کرے گا۔
قال اللہ تعالیٰ: ﴿وَلوْ شِئْنا لآتینا کلَّ نفسٍ ھدَاہا و لَکنْ حقَّ القوْلُ منی لامْلَانَّ جہنم مِنَ الجنَّۃ و النَّاسِ أجمعین﴾ (السجدة: 13)۔
اس آیت سے واضح ہے کہ اگر خدا تعالیٰ چاہتا ، سب کو مومن کر دیتا ، مگر جو فرما چکا ہے، اس کے خلاف نہ کرے گا اور یہ سب اختیار سے ہے، اضطرار سے نہیں، وہ فاعل مختار ،فعال لمایرید ہے، یہ عقیدہ ہے تمام علماءِامت کا۔اھ (فتاویٰ رشیدیہ صفحہ نمبر93) ۔