دو مختلف کرنسیوں کا کمی بیشی کیساتھ بیچنا،اور کسی ایک فریق کا اس پر قبضہ کرنے کاحکم

میں انسٹافورکس میں کام کرتا ہوں،جو آن لائن کاروبار ہے، جس میں کرنسی کو خریدا اور بیچا جاتا ہے، یہ لوگ اسلامک اکاونٹ آفر کرتے ہیں، جس میں نہ آپ سے سود لیا جاتا ہے،اور نہ دیا جاتا ہے، اور اس کا طریقہ یہ ہے کہ دو کرنسیوں کے جوڑے ہوتے ہیں، انہیں خریدا اور بیچا جاتا ہے ، جیسا کہ USD/GBP اس کا مطلب ہیکہ اس ڈالر کے مقابلہ میں انگلینڈ کا پونڈ ہے ،اگر اس کو خریدا جائے ،تو منافع تب ہو گا، جب پونڈ گر جائے ،اور اگر اس کو بیچا جائے ،تو منافع تب ہو گا جب ڈالر گر جائے۔ کیا یہ جائز ہے یا نہیں ؟

الجوابُ حامِدا ًو مُصلیِّا ً

اگرچہ دو مختلف کرنسیوں کا کمی بیشی کیساتھ بیچنے اور کسی ایک فریق کے اپنے حق پر قبضہ کر لینے کی صورت میں درست ہے ،یہ کمی بیشی سود کے زمرے میں نہیں، مگر آج یہ کاروبار جوئے کی شکل اختیار کرتا جارہا ہے ،اور اس کیلئے مختلف صورتیں اختیار کی جاتیں ہیں۔اس لئے اپنی واقعی ضرورت کے تحت تو اس میں قباحت نہیں۔ البتہ اسے باقاعدہ ایک مشغلہ بنانا اور اپنے حق پر قبضہ کئے بغیر محض کمپیوٹر اسکرین پر مختلف کرنسیوں کے بھاؤ دیکھ کر فرق برابر کر کے بچنے والی زائد رقم لے لینا وغیرہ درست نہیں ،اس سے احتراز لازم ہے۔

مأخَذُ الفَتوی

قال الله تبارك وتعالى: ﴿يَاأَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ﴾ (المائدة: 90)
وفي أعلاء السنن: لا يجوز بيع شيئ قبل قبضه سواء جمیع المبيعات (۱۴/۲۲۷) والله اعلم بالصواب