بینک میں کرنٹ اکاؤنٹ کھلوانا اور اسکی ملازمت کاحکم

مفتی صاحب! میرا سوال یہ ہے کہ کیا بینک میں کرنٹ اکاؤنٹ میں پیسے رکھوانا جائز ہے یا نہیں؟ سود تو اس پر بھی چڑھتا ہے، مگر اس کو وصول نہیں کرتے، لیکن ہم اس بینک کے لئے سود کی رقم shoor کر کے ان کا کاروبار بڑھا رہے ہیں۔
میرا دوسرا سوال یہ ہے کہ کیا بینک میں نوکری کرنا جائز ہےکہ نہیں؟ اگر جائز ہے تو اس کی وجوہات تفصیل سے بتا دیں۔ آپ سے دعاؤں کی درخواست ہے۔

الجوابُ حامِدا ًو مُصلیِّا ً

عام بینکوں میں کرنٹ کاؤنٹ کھلوانے کی بجائے بہتر ہے کہ موجودہ اسلامی بینکوں میں اکاؤنٹ کھلوایا جائے، اور وہ بھی کرنٹ کاؤنٹ اور بوقتِ مجبوری، ورنہ اس سے بھی احتراز بہتر ہے۔
جبکہ بینک کی ایسی ملازمت جس کا تعلق براہِ راست سودی معاملات سے ہے، جیسے منیجر اور کیشئر وغیرہ کی ملازمت ، ایسی ملازمت بالکل حرام اور ناجائز ہے، چنانچہ ایک حدیث میں ہے ’’لعن رسول اللہ صلی اللہ علیہ وسلم أكل الربو وموكله وكاتبه و شاهدیه قال وهم سواء‘‘۔ (مسلم شریف ج ۲ ص ۲۷) یعنی رسول اللہ ﷺ نے سود کھانے والے، سود دینے والے ، سودی تحریر لکھنے والے ، اور سودی شہادت دینے والے پر لعنت فرمائی ہے اور فرمایا کہ وہ وہ سب لوگ گناہ میں برابر ہیں۔ اور ایسی ملازمت سے حاصل ہونے والی آمدنی بھی حرام ہے ، لیکن بینک کی وہ ملازمت جس کا تعلق براہِ راست سودی معاملات سے نہیں ، نہ اس کا تعلق سود کے لکھنے سے ہے، نہ سود پر گواہ بننے سے ہے اور نہ سودی معاملات سے ہے اور نہ سودی معاملات میں کسی قسم کی شرکت ہوتی ہے، جیسے چوکیداری کی ملازمت، ایسی ملازمت اور اس سے حاصل ہونے آمدنی کے متعلق علماءِ کرام کی آراء مختلف ہیں۔
ایک رائے تو یہ ہے کہ بینک کی ایسی ملازمت جس کا سودی معاملات سے کسی قسم کا تعلق نہیں، یہ بھی جائز نہیں ،کیونکہ ایسے ملازمین کا سودی معاملات میں کوئی عمل دخل نہیں، لیکن انہیں جو تنخواہ دیجاتی ہے، وہ ان رقوم کے مجموعہ سے دیجاتی ہے جو بینک میں موجود ہوتی ہیں اور اس میں سود بھی شامل ہوتا ہے، اس لئے ایسی ملازمت بھی جائز نہیں ۔
جبکہ دوسری رائے یہ ہے کہ بینک کی صرف ایسی ملازمت جس کا سودی معاملات سے کسی قسم کا تعلق نہیں, یہ جائز ہے۔ اور اس کی وجہ یہ ہے کہ ان ملازمین کو جو تنخواہ دیجاتی ہے وہ اگر چہ ان ر قوم کے مجموعہ سے دیجاتی ہے جو بینک میں موجود ہوتی ہیں، لیکن بینک میں موجود ساری رقم سودی نہیں ہوتی ،بلکہ اس میں کئی قسم کی رقمیں مخلوط ہوتی ہے، یعنی وہ رقوم بھی ہوتی ہیں جو لوگوں نے اپنے کھاتوں میں جمع کروائی ہوتی ہیں، یعنی بینک نے وہ رقم قرض کے طور پر لی ہے اور وہ وہ رقوم بھی ہوتی ہیں جو بینک مالکان کا اصل سرمایہ ہے اور وہ رقوم بھی ہوتی ہےجو بطورِ سود کے حاصل کی گئی ہیں ،لیکن بینک میں جمع رقوم اکثر پہلی دو قسم کی ہوتی ہیں اور آخری قسم کی رقوم ان کی بنسبت کم ہوتی ہیں، اس لئے بینک میں موجود اکثر رقوم حلال ہوتی ہیں، لہذا اگر اس مجموعی مخلوط رقم سے ایسے ملازم کو تنخواہ دی جاتی ہے، جس کا سودی معاملات سے کسی بھی قسم کا تعلق نہیں تو ا س کے لئے ایسی ملازمت اور اس سے حاصل ہونے والی تنخواہ حرام نہیں۔ البتہ بہتر یہی ہے کہ ان بینکوں کی ایسی ملازمت بھی اختیار نہ کی جائے۔