استخارہ کا طریقہ اور کسی دوسرے شخص سے استخارہ کرانے کا حکم

آپ میری بیٹی کے لئے استخارہ کریں اور بتائیں کہ کیا یہ لڑکا (سیّد طلحہ قاسمی ولد نجمیٰ نسیم ) اس کے نکاح کے لئے صحیح ہے، بیٹی کا نام صائمہ صحر ولد کوثر سلطانہ ہے۔

الجوابُ حامِدا ًو مُصلیِّا ً

واضح ہو کہ استخارہ دوسروں سے نہیں کروایا جاتا، بلکہ اگر کسی کام کے بارے میں یہ معلوم کرنا ہو کہ اس کا کرنا بہتر ہے یا چھوڑنا، تو اس کیلئے خود استخارہ کرنا چاہیے۔
جس کا مسنون طریقہ یہ ہے کہ آدمی دو رکعت نفل استخارہ کی نیت سے پڑھے، نیت یہ کرے کہ میرے سامنے دو راستے ہیں، اس میں سے جو راستہ میرے حق میں بہتر ہو، اس کے بارے میں میری راہ نمائی کر دی جائے، پھر دو رکعت نفل پڑھے اور نماز کے بعد یہ دعا پڑھے :-
” أللّٰهُمَّ إنی أَسْتَخِيْرُكَ بعِلْمِكَ، وأسْتَقْدِرُكَ بِقُدْرَتِكَ، وَأَسْألُكَ مِنْ فَضْلِكَ الْعَظِيْمِ، فَإِنَّكَ تَقْدِرُ وَلَا أَقْدِرُ، وَتَعْلَمُ وَلَا أَعْلَمُ، وَأَنْتَ عَلَّامُ الْغُيُوْبِ، أللّٰهُمَّ إنْ كُنْتَ تَعْلَمُ أنَّ هٰذَا الْأَمْرَ خَيْرٌ لَيْ فی دِيْنِيْ، وَمَعَاشِيْ، وَعَاقِبَةِ أَمْرِيْ، فَاقْدِرْهُ لِیْ، وَيَسِّرْهُ لِیْ، ثُمَّ بَارِكْ لِي فیه، وَإنْ كُنْتَ تَعْلَمُ أنَّ هٰذَا الْأَمْرَ شَرٌّ لِي فی دِيْنِيْ وَمَعَاشِيْ، وَعَاقِبَةِ أَمْرِيْ، فَاصْرِفْهُ عَنِّي، وَاصْرِفْنِي عَنْهُ، وَاقْدِرْ لِيَ الْخَيْرَ حَيْثُ كَانَ، ثُمَّ أَرْضِنِي بِه.“
اور جب ”هٰذَا الْأَمْرَ “ پر پہنچے( جس لفظ پر لکیر بنی ہے) تو اس کے پڑھتے وقت اسی کام کا دھیان(خیال) کرلے جس کے لئے استخارہ کرنا چاہتا ہے، اس کے بعد پاک وصاف بچھونے پر قبلہ کی طرف منہ کر کے با وضو سو جائے،جب سو کر اٹھے اس وقت جو بات دل میں مضبوطی سے آوے، وہی بہتر ہے، اسی کو کرنا چاہیے، کہ یہی استخارہ ہے۔