میرے والد صاحب کا انتقال ٹی بی کے مرض میں ہو چکا ہے، بیماری کے دوران ان کے رمضان کے روزے قضا ہوئے تھے، اگر ان کی اولاد ان کے قضا روزوں کا فدیہ ادا کرنا چاہیں، تو اس کی کیا صورت ہوگی ؟کیا اس فدیہ کی رقم سے کسی مقروض کا قرض اتارا جا سکتا ہےیا مسکینوں کو کھانا کھلانا ہی فرض ہے؟اس کے علاوہ اس رقم کو کن کن کاموں میں صرف کیا جا سکتا ہے؟ اس رقم کو یکمشت دیا جائے یا استطاعت کے مطابق وقتا فوقتا ادا کر سکتے ہیں؟ فی روزہ اس کا نصاب بھی مقرر کردیں۔
مرحوم نے اگر اپنے فوت شدہ روزوں کا فدیہ دینے کی وصیت کی ہو، اور اس کے ترکہ میں اس قدر مال بھی ہو ،تو اس کا ادا کرنا واجب ہے اور اگر اس نے وصیت نہ کی ہو ،تو ورثار پر اس کا فدیہ دینا واجب نہیں، تاہم اگر ورثاء عاقل، بالغ ہوں وہ سب یا ان میں سے کوئی ایک اپنی مرضی سے مرحوم کا فدیہ دینا چاہے ،تو یہ عمل ان کی طرف سے تبرع ہوگا ،جبکہ فی روزہ فدیہ کی مقدار یہ ہے کہ مستحقین زکوٰۃ میں سے ایک مستحق کو صدقہ فطر کی مقدار یعنی پونے دوسیر گندم یا اس کی قیمت کا مالک بنا دیا جائےم مگر اس کا یکمشت دینا لازم نہیں ،بلکہ حسب استطاعت جتنا ممکن ہو دیا جا سکتا ہے۔