کیا فرماتے ہیں علماءِ دین ومفتیان شرع متین اس مسئلہ کے بارے میں کہ ایک آدمی روزہ رکھنے سے عاجز ہو گیا یعنی اس کی عمر شیخ فانی کی حدتک پہنچ گئی اور مذکور شیخ نے گزشتہ زندگی میں بھی بہت سے روزے قصداً کھائے ہیں اور ان کی تعداد بھی معلوم نہیں ہے اور بعض روزہ رکھ کر بھی قصداً توڑے ہیں، اور ان کی تعداد بھی معلوم نہیں ہے تو ا س پر کتنے کفارات لازم آئیں گے؟ مثلا بیس (۲۰) یا تیس (۳۰): سال اس نے روزہ رکھا ہی نہیں اور اگر رکھا بھی ہے تو قصدا توڑ دیے ہیں اور ان کی تعداد بھی معلوم نہیں ۔ تو اس صورت میں اس پر بے شمار کفارات لازم آئینگے اب اس کے پاس اتنا مال نہیں کہ ان روزوں کے کفارہ ادا کرے۔
کیا یہ شخص کفارات کی ادائیگی کے لیے حیلہ اسقاط کر سکتا ہے نیز اس کی شرعی حیثیت کیا ہے؟
ایسے شخص پر لازم ہے کہ جتنے روزے رکھ کر اس نے توڑے ہیں انہیں ایک غالب اندازہ کے مطابق دو حصوں میں اس طرح تقسیم کرے کہ جتنے روزے جماع کی بناء پر توڑے ہوں ایک تعداد متعین کرے اور ان سب کا الگ الگ کفارہ ادا کرے اور جتنے روزے کھانے پینے کے وغیرہ کی بناء پر توڑے ہوں ان کا بھی ایک اندازہ متعین کر کے ہر رمضان کی طرف سے الگ الگ فقط ایک ایک کفارہ ادا کرے ۔ چنانچہ اس ترتیب سے کفارے بھی کم لازم ہونگے اور ان کی تعیین بھی آسان ہوگئی ہے۔ اور شرعا بھی اس کا یہی حکم ہے اور حیلہ اسقاط کی بھی ضرورت نہیں پڑیگی۔ اور بلا ضرورت اس سے احتراز بھی چاہیے۔
کما في التاتار خانیة: اذا افطر مرارا في رمضان واحد عليه كفارة واحدة اھ (۲/ ۲۷۹)۔
و في الدر المختار: أن الفطر بغير الجماع تداخل وإلا لا اھ (2/ 413)۔
و في حاشية ابن عابدين (رد المحتار): (قوله: وإلا لا) أي وإن كان الفطر المتكرر في يومين بجماع لا تتداخل الكفارة، وإن لم يكفر للأول لعظم الجناية اھ (2/ 413)۔
و في الفقه الإسلامي وأدلته: وإن جامع في يومين من رمضان واحد، ولم يكفر لليوم الأول، فعليه كفارتان؛ لأن كل يوم عبادة اھ (3/ 103)۔ والله اعلم بالصواب