صف میں خالی جگہ پر کرنے کیلئے نمازی کے آگے سے گزرنے کا حکم

السلام علیکم محترم!
میں اسکول میں مدرس ہوں، ہمارے اسکول میں بعض علماءِ کرام کا یہ کہنا ہے کہ باجماعت نماز میں امام صاحب کا سترہ کافی ہے اور اگلی صفوں میں جگہ کی موجودگی کو پاکر نمازی کو پھلانگ کر جانے کی ممانعت نہیں ہے، البتہ امام کے بغیر نماز پڑھتے ہوئے نمازی کے آگے سے گزرنا خلافِ شریعت ہے، رہنمائی فرمائیں!

الجوابُ حامِدا ًو مُصلیِّا ً

واضح ہو کہ اگر مسجد میں جماعت سے نماز ادا کی جارہی ہو اور امام کے آگے سترہ ہو تو وہ سترہ مقتدی کا بھی سترہ شمار ہوگا، لہذا نماز کی ادائیگی کے دوران کسی عذر کی بناپر کسی شخص کو مقتدیوں کے سامنے سے گزرنے کی ضرورت پڑے تو اس کے لئے مقتدیوں کے سامنے سے گزرنا جائز ہوگا اور وہ شخص اس سے گنہگار بھی نہ ہوگا، جبکہ جماعت کھڑی ہونے اور صفیں بننے کے بعد اگر پہلی صف میں کوئی جگہ خالی ہو، اور پچھلی صف سے کوئی شخص خالی جگہ کو پر کرنے کے لئے آگے بڑھنا چاہتا ہو، تو ایسی صورت میں مطلقاً ( چاہے امام صاحب کے سامنے سترہ ہو یا نہ ہو) کسی کو اضافی ایذاء دیے بغیر اس صف کو مکمل کرنے لئے آگے بڑھنا جائز ہوگا۔

مأخَذُ الفَتوی

کما فی الدر المختار: (وكفت سترة الامام) للكل (ولو عدم المرور والطريق جاز تركها) وفعلها أولى اھ (ج1، ص 638، ط: سعید)۔
وفی رد المحتار: تحت (قولہ للکل) للمقتدین بہ کلھم، وعلیہ فلو مر مار فی قبلۃ الصف فی المسجد الصغیر لم یکرہ اذا کان للامام سترۃ الخ (ج1، ص 638، ط: سعید)۔
وفی الدر المختار: ولو وجد فرجة في الأول لا الثاني له خرق الثاني لتقصيرهم، وفي الحديث «من سد فرجة غفر له» وصح «خياركم ألينكم مناكب في الصلاة» وبهذا يعلم جهل من يستمسك عند دخول داخل بجنبه في الصف ويظن أنه رياء كما بسط في البحراھ (باب الامامۃ، ج1، ص570، ط؛ سعید)۔
وفی رد المحتار: تحت قوله لتقصيرهم) يفيد أن الكلام فيما إذا شرعوا. وفي القنية قام في آخر صف وبينه وبين الصفوف مواضع خالية فللداخل أن يمر بين يديه ليصل الصفوف لأنه أسقط حرمة نفسه فلا يأثم المار بين يديه الخ (باب الامامۃ، ج1، ص570، ط؛ سعید)۔
وفی الہدایۃ: وسترة الإمام سترة للقوم " لأنه عليه الصلاة والسلام صلى ببطحاء مكة إلى عنزة ولم يكن للقوم سترة اھ(باب ما یفسد الصلاۃ وما یکرہ فیھا، ج1 ص 141، ط:رحمانیۃ)۔