گھر خریدنے کیلئے استخارہ کروانا کیسا ہے؟

جناب مفتی صاحب! مجھ کو گھر خریدنے کے لئے استخارہ کروانا ہے کہ میں جو گھر خرید رہا ہوں، وہ میرے لئے صحیح ہے یا نہیں؟ خریدنے والا گھر چاپل اپارٹمنٹ میں ہے، جو کہ صفورا گوٹھ سے آگے پڑتا ہے ۔ جزاک الله خیراً !

الجوابُ حامِدا ًو مُصلیِّا ً

واضح ہو کہ استخارہ دوسروں سے نہیں کروایا جاتا، بلکہ اگر کسی کام کے بارے میں یہ معلوم کرنا ہو کہ اس کا کرنا بہتر ہے یا چھوڑنا، تو اس کیلئے خود استخارہ کرنا چاہیے۔
جس کا مسنون طریقہ یہ ہے کہ کہ آدمی دو رکعت نفل استخارہ کی نیت سےپڑھے، نیت یہ کرے کہ میرے سامنے دو راستے ہیں، اس میں سے جو راستہ میرے حق میں بہتر ہو اس کے بارے میں میری رہنمائی کر دی جائے، پھر دو رکعت نفل پڑھے،اور نماز کے بعد یہ دعا پڑھے :-
”اللهمَّ إنِّي أَسْتَخِيْرُكَ بعِلْمِكَ، وأسْتَقْدِرُكَ بِقُدْرَتِكَ، وَأَسْألُكَ مِنْ فَضْلِكَ الْعَظِيْمِ، فَإِنَّكَ تَقْدِرُ وَلَا أَقْدِرُ، وَتَعْلَمُ وَلَا أَعْلَمُ، وَأَنْتَ عَلَّامُ الْغُيُوْبِ، اللهمَّ إنْ كُنْتَ تَعْلَمُ أنَّ هٰذَا الْأَمْرَ خَيْرٌ لَيْ فِي دِيْنِيْ، وَمَعَاشِيْ، وَعَاقِبَةِ أَمْرِيْ وَعَاجِلِه، وَيَسِّرْهُ لِیْ، ثُمَّ بَارِكْ لِي فِيْه، وَإنْ كُنْتَ تَعْلَمُ أنَّ هٰذَا الْأَمْرَ شَرٌّ لِي فِي دِيْنِيْ وَمَعَاشِيْ، وَعَاقِبَةِ أَمْرِيْ، واٰجِلِه، فَاصْرِفْهُ عَنِّي، وَاصْرِفْنِي عَنْهُ،وَاقْدِرْ لِيَ الْخَيْرَ حَيْثُ كَانَ، ثُمَّ أَرْضِنِي بِه.“
اور جب ”هٰذَا الْأَمْرَ “ پر پہنچے( جس لفظ پر لکیر بنی ہے) تو اس کے پڑھتے وقت اسی کام کا دھیان(خیال) کرلے جس کے لئے استخارہ کرنا چاہتا ہے، اس کے بعد پاک وصاف بچھونے پر قبلہ کی طرف منہ کر کے با وضو سو جائے،جب سو کر اٹھے اس وقت جو بات دل میں مضبوطی سے آوے، وہی بہتر ہے، اسی کو کرنا چاہیے، کہ یہی استخارہ ہے۔