السلام علیکم! مہربانی فرما کر آگاہی دیں کہ (۱) پاکستان رمضان کے شروع ہونے کے لئے کیا معیار رکھتا ہے؟ (۲) کیا چاند کا دکھائی دینا قریب کے ملکوں میں جیسے بھارت ، نیپال، بنگلہ دیش وغیرہ قابل قبول ہے؟ (۳) مہربانی فرما کر متعلقہ ثبوت دیں، غیر ملک میں چاند دکھائی دینے کے اور قبول کرنے کے سلسلے میں اور سائنس کے معلومات اور حساب کتاب کو استعمال کرنے یا نہ کرنے کے بارے میں بتائیں۔
پاکستان میں حکومت کی طرف سے اربابِ علم و بصیرت کی ایک رویتِ ہلال کمیٹی مقرر ہے جو جدید آلات کی مدد سے ملک کے مختلف مقامات سے چاند دیکھنے کا اہتمام کرتی ہے، اس کے باجود اگر ملک کے کسی بھی دوسرے مقام پر چاند دیکھا جائے تو ان لوگوں سے شہادت لے کر اطمینان ہوجائے تب بھی چاند کے نظر آنے کا اعلان کر دیتی ہے، یہ اعلان سرکاری اعلان کہلاتا ہے ، جسے ریڈیو وغیرہ کے ذریعہ عوام تک پہنچایا جاتا ہے۔
۲، ۳۔ اس سلسلہ میں احناف رحمہ اللہ کے تین قول ہیں ، ان میں سے یہ قول کہ بلادِ بعیدہ میں اختلافِ مطالع معتبر ہے نہ کہ قریبہ میں،معتبر اور مفتی بہ ہے۔ اور بلاد بعیدہ سے مراد وہ شہر یا ممالک ہیں جن کے درمیان اتنا فاصلہ ہو کہ ایک جگہ کی رؤیت دوسری جگہ اعتبار کرنے کے نتیجہ میں مہینہ کے دن اٹھائیس رہ جائیں یا اکتیس ہو جائیں ، وہاں اختلافِ مطالع کا اعتبار کیا جائے گا۔ اور جہاں اتنا فاصلہ نہ ہو وہاں نظر انداز کیا جائے گا، چنانچہ پاکستان میں بھی اس اصول اور مفتی بہ قول کا اعتبار کیا جاتا ہے ۔
۔ اسی طرح سائنس اور ٹیکنا لوجی کی جو معلومات قرآن و سنت کے کسی صریح اصول اور قانون کے ساتھ متصادم نہ ہوں انہیں لینے اور قبول کرنے سے اسلام قطعاً منع نہیں کرتا۔
ففي بدائع الصنائع في ترتيب الشرائع: هذا إذا كانت المسافة بين البلدين قريبة لا تختلف فيها المطالع، فأما إذا كانت بعيدة فلا يلزم أحد البلدين حكم الآخر لأن مطالع البلاد عند المسافة الفاحشة تختلف فيعتبر في أهل كل بلد مطالع بلدهم دون البلد الآخر اھ (2/ 83)۔
و في الدر المختار: ولا عبرة بقول المؤقتين، ولو عدولا على المذهب اھ (2/ 387)
و في الفتاوى الهندية: وهل يرجع إلى قول أهل الخبرة العدول ممن يعرف علم النجوم الصحيح أنه لا يقبل كذا في السراج الوهاج ولا يجوز للمنجم أن يعمل بحساب نفسه كذا في معراج الدراية اھ (1/ 197)