جس شخص کے پاس ذاتی گاڑی ، خود کی موٹرسائیکل ہو ، اسے زکوۃ دی جاسکتی ہے؟

السلام علیکم ! (1) حضرت میرے آفس میں ڈرائیور ہے جس کا بھائی پہلے اپنی گاڑی ٹیکسی کے طور پر چلاتا تھا اور روزی کماتا تھا۔ وہ اب شوگر کی وجہ سے بہت بیمار ہے، اور اس کی ٹانگ اور آنکھ میں تکلیف ہے جس کی وجہ سے اب وہ گھر میں رہتا ہے ، اور گاڑی نہیں چلا سکتا ، ایسے شخص کو زکوٰۃ دی جاسکتی ہے ؟ کیونکہ اس کے پاس اپنے علاج کے بھی پیسے نہیں ہوتے ۔ (2) کیا ایسے شخص کو زکوۃ دی جاسکتی ہے جس کے پاس گاڑی موٹر سائیکل اپنا گھر ، ٹی وی، وغیرہ ہو مگر نصاب کے بقدر رقم یا سونا ، چاندی نہ ہو؟ (3 ) مہر کی رقم کیا زکوٰۃ والی رقم سے نکالی جاسکتی ہے مثلًا میرے پاس ملکیت میں سونا ہے مگر اپنی بیوی کا مہر بھی ادا کرنا ہے تو سونے کی رقم سے مہر کی رقم نکال کر زکوٰۃ ادا کی جائے گی یا سونے کی مجموعی رقم پر زکوٰۃ ادا کرنی ہوگی ؟ جزاک اللہ!

الجوابُ حامِدا ًو مُصلیِّا ً

1)) صورتِ مسئولہ میں مذکور شخص اگر مستحقِ زکوۃ ہو ، یعنی اس کی ملکیت میں مذکور ٹیکسی کے علاوہ ساڑھے سات تولہ سونا یا ساڑھے باون تولہ چاندی یا ساڑھے باون تولہ چاندی کی مالیت کے بقدر مالِ تجارت ، نقدی اور حاجات اصلیہ سے زائد سامان نہ ہو یا ان سب کا مجموعہ بقدر نصاب نہ ہو، اور وہ سید بھی نہ ہو تو اس کو زکوٰۃ دینا شرعًا جائز اور درست ہے۔(2) کسی کی ملکیت میں استعمال اشیاء کے علاوہ ساڑھے سات تولہ سونا یا ساڑھے باون تولہ چاندی یا اس کی مالیت کے بقدر مال تجارت نقدی اور ضروری سے زائد سامان یا ان سب کا مجموعہ بقدر نصاب نہ ہو اور وہ سید بھی نہ ہو تو ایسے شخص کو زکوۃ دی جا سکتی ۔ (3) مہر اگر معجّل ہو تو زکوٰۃ کا حساب لگاتے وقت اس کو منہا کیا جاسکتاہے، لیکن اگر مہر مؤجّل ہو اور ابھی تک مقررہ تاریخ نہ آئی ہو تو زکوٰۃ کاحساب لگاتے وقت مہر کو منہا کرنا درست نہیں ، بلکہ ٹوٹل اموال زکوٰۃ کا حساب لگا کر اس کا ڈھائی فیصد دینا لازم ہے۔

مأخَذُ الفَتوی

کما فی الدّر: ( و سببہ) ای سبب افتراضھا (ملک نصاب حولی) نسبۃ للحول لحولانہ علیہ (الی قولہ) (فارغ عن دین لہ مطالب من جھۃ العباد) سواء کان للہ کزکاۃ و خراج، او للعبد و لو کفالۃ او مؤجلًا ولو صداق زوجتہ المؤجّل للفراق و نفقۃ لزمتہ بقضاء او رضاءٍ الخ (کتاب الزکاۃ،ج: 2، صـ: 260، ط: سعید )۔
و فی الھندیۃ: ( منھا الفقیر) وھو من لہ ادنی شیئ و ھو ما دون النصاب او قدر نصاب غیر تامٍ و ھو مستغرق فی الحاجۃ فلایخرجہ عن الفقر ملک نصب کثیرۃ غیر نامیۃ اذاکانت مستغرقۃ بالحاجۃ کذا فی فتح القدیر (الی قولہ ) (و منھا المسکین) و ھو من لا شیئ لہ الخ (الباب السابع فی المصارف، ج: 1 صـ: 187، ط: ماجدیہ،)۔