مصائب اور پریشانیوں سے چھٹکارا پانے کیلئے وظیفہ

السلام علیکم! مجھے یہ پوچھنا ہے کہ ہمارے گھر کے حالات ہمیشہ خراب رہتے ہیں، ہمارے گھر میں سب بے روز گار ہیں اور لڑکیوں کے رشتوں کے مسائل ہیں اور ہروقت کوئی نہ کوئی بیمار رہتا ہے اور بھی بہت سی پریشانیاں ہیں، جن کے متعلق بہت سے اسکالروں سے پوچھا ہے، سب یہی کہتے ہیں استغفار کا ورد کریں، ہم سالوں سے استغفار کا ورد کر رہے ہیں اور بھی بہت سے وظیفے پڑھتے ہیں، لیکن کچھ دنوں کے لیے حالات صحیح ہو جاتے ہیں، لیکن پھر سے وہی پریشانیاں شروع ہو جاتی ہیں اور میری بہن جن کا نام عظمیٰ ہے وہ بہت برے خواب بھی دیکھتی ہے، ہم بہت پریشان ہیں، مہربانی کر کے کوئی وظیفہ بتا دیجیے۔ شکریہ!

الجوابُ حامِدا ًو مُصلیِّا ً

اس کا اصل علاج رجوع الی اللہ اور اتباعِ سنت نبوی ہے، اس لئے گھر کے تمام افراد پر لازم ہے کہ مرد حضرات مسجد جا کر باجماعت اور عورتیں گھر میں پنجوقتہ نماز کی پابندی کریں، ہر فرد نمازِ فجر کے بعد”سورۂ یٰسین“”منزل شریف“ نمازِ عصر کے بعد”سورۂ مزمل“اور مغرب کے بعد”سورۂ مُلْک“(تبَاَرَکَ الذِیْ) اور”سورۂ واقعہ“پڑھنے کا اہتمام کریں اور اور”الاسماء الحسنٰی“پڑھ کر خوب توجہ و دھیان سے اللہ تعالیٰ کے حضور اپنی تمام پریشانیاں بیان کر کے ان کے حل اور عافیت اور دیگر ضروریات کی دعا کریں اور اتباعِ سنتِ نبوی کو اپنی زندگی کا معمول بنالے، ان شاء الله تمام پریشانیاں دور ہو کر اللہ تعالیٰ کی قربت نصیب ہوگی اور سکونِ قلب کے ساتھ ساتھ مسائل کے حل میں بھی آسانی ہو گی،دعا ہے کہ رب کریم آپ کو اپنے نیک بندوں میں شمار فرما کر آپ کی پریشانیوں کو بھی دور فرما دیں۔