اچھا رشتہ ملنے کیلئے وظیفہ

السلام وعلیکم! میرا نام عائشہ ہے میری والدہ کا نام فلانہ ہے، میری عمر 33 ہے۔ میرا سوال یہ ہے کہ میری شادی نہیں ہورہی ۔کوئی اچھا رشتے نہیں آتے۔ میں نے بہت سے وظیفہ کرلیےہیں لیکن کوئی حل نہیں نکل رہا ،میں نماز پا بندی سے پڑھتی ہوں ،دعائیں بھی مانگتی ہوں ۔آپ کوئی وظیفہ بتادیں نام میرا ٹھیک ہے یا تبدیل کرنا چاہیے؟ میری تاریخ پیدائش 1مئ 1992 ہے براہِ مہربانی میرے لئے دعا کیجیے اور مجھے پڑھنے کے لئے کوئی وظیفہ بتادیں ۔جزاک اللّہ خیراً کثیراً۔

الجوابُ حامِدا ًو مُصلیِّا ً

شادی بیاہ کے معاملات اور مناسب رشتہ کا بر وقت مل جانا من جانب اللہ ہوتا ہے جو مقرر وقت پر ہی انجام پاتے ہیں اس لئے ایسے امور سے متعلق فرائض کے اہتمام کے ساتھ مسنون اعمال اور دعاؤں کا بھی خوب اہتمام چاہیئے کہ اللہ رب العزت کی جانب سے ہمارے حق میں بہتر فیصلہ ہو، لہذا سائل کو چاہیئے فرائض اور مسنون دعاؤں کے اہتمام کے ساتھ ساتھ ”سورۂ طٰہٰ “کی آیت نمبر(۱۳۱/۱۳۲) ” {وَلَا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فیهِ وَرِزْقُ رَبِّكَ خَيْرٌ وَأَبْقَى ، وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا لَا نَسْأَلُكَ رِزْقًا نَحْنُ نَرْزُقُكَ وَالْعَاقِبَةُ لِلتَّقْوَى} “کو لکھ کر بازو پر باندھے، ان شاء اللہ جلد ہی بہتر نتائج مرتب ہوں، یہ انتہائی مجرب عمل ہے۔(از اعمالِ قرآنی)
اس طرح نماز کی پابندی کے ساتھ ساتھ روزانہ تلاوتِ قرآن کریم کا اہتمام اور عشاء کے بعد”یَا رَحِیْمُ،یَا وَدُوْدُ“ چالیس دنوں تک روزانہ پابندی کے ساتھ گیارہ سو(۱۱۰۰)مرتبہ اول وآخرتین تین مرتبہ درود شریف پڑھنا بھی بہت مفید اور مجرب عمل ہے،امید ہے اللہ تعالی خیر کا معاملہ فرمائیں گے ۔