حصولِ رزق اور شادی کیلئے وظیفہ

محترم میری منگنی ہو چکی ہے، اب شادی کا بہت دباؤ ہے مجھ پر، کہ پیسے دو تو شادی کریں، شادی کیلئے لاکھوں روپے چاہیئں، میں اتنے سارے پیسے کہاں سے لاؤں، جبکہ میں ابھی اس وقت بے روزگار ہوں، میں ایک وکیل ہوں، پر میرے پاس کام ہی نہیں آتا اور مالی لحاظ سے پریشان رہتا ہوں، شادی کے بعد بھی روزمرہ کے بہت خرچے ہیں، ایسا کوئی عمل یا دعا بتادیجیے کہ غیب سے اللہ پاک اسباب پیدا کر دے اور ہر کام میں آسانی پیدا ہو جائے، نیز ازدواجی زندگی بھی اچھی اور پر سکون گزرے اور نیک صالح اولاد پیدا ہو اور پروان چڑھے۔

الجوابُ حامِدا ًو مُصلیِّا ً

سائل کو چاہیے کہ تمام گناہوں سے توبہ کر کے اوامر کی ادائیگی اور نواہی سے بچنے کی فکر کرے اور نمازوں کی پابندی کے ساتھ اللہ تعالیٰ سے خوب دعا بھی کرے، کیونکہ وہی مسبب الاسباب ہے اور اس کے ساتھ ساتھ”سورۂ شوریٰ“ کی آیت نمبر(۱۹) کو کثرت سے پڑھے، جبکہ صبح”سورۂ یٰسین“اور مغرب اور عشاء کے درمیان ”سورۂ واقعہ“ اور”سورۂ مزمل“کو ایک ایک مرتبہ پڑھنا مفید بھی رہے گا۔
”{اللّٰهُ لَطِيفٌ بِعِبَادِهِ يَرْزُقُ مَنْ يَشَاءُ وَهُوَ الْقَوِيُّ الْعَزِيزُ}“ [الشورى:19] ( اعمالِ قرآنی، ص:۳۵)

مأخَذُ الفَتوی

وفي تفسير ابن كثير: عن عبد الله بن مسعود قال: سمعت رسول الله صلى الله عليه وسلم يقول: "من قرأ سورة الواقعة كل ليلة لم تصبه فاقة أبدا" اھ (4/359)