بھائیوں کی موجودگی میں مرحوم کے بھتیجے میراث میں حصہ دار ہونگے؟

میرا بڑا بھائی۔۔۔ جولائی 2025 میں فوت ہوگیا ہے، رشتہ داروں میں ایک بیوہ ، تین زندہ اور دو پہلے سے متوفی بھائی جن کی اولاد زندہ ہے ،چوڑے ہیں ،والدین میں کوئی زندہ نہیں ۔ ان میں کون اور کتنے فیصد کے حصہ دار بنیں گے؟ والسلام۔
نوٹ: سائل نے فون پر وضاحت کی کہ دوبھائیوں کی وفات مرحوم سے دس گیارہ سال پہلے ہوگئی تھی، بڑے بھائی کے دو بیٹے اور تین بیٹیاں جبکہ دوسرے بھائی کی ایک ہی بیٹی تھی۔

الجوابُ حامِدا ًو مُصلیِّا ً

واضح ہو کہ جس وارث کا انتقال مورث کے انتقال سے پہلے ہو جائے،تو شرعاً ان کی اولاد کااپنے والد کے توسط سے مورث کے ترکہ میں حصہ نہیں ہوتا،البتہ اگر دیگر ورثاء اپنی مرضی و رضامندی سے ان کو ترکہ میں سے کچھ دینا چاہیں ،تو ان کو اختیار ہےاور ایسا کرنا افضل و بہتر بھی ہے، لہذا سائل کے جن بھائیوں کا انتقال مرحوم ۔۔۔۔سے پہلے ہوا ہے،تو ان کی اولاد کا مرحوم ۔۔۔کے ترکہ میں کوئی حصہ نہیں بلکہ اس کا ترکہ مرحوم کی بیوہ اور دیگر بھائیوں میں تقسیم ہوگا جس کی تفصیل ذیل میں آرہی ہے۔
کما فی رد المحتار: وأركانه ثلاثة: وارث ومورث وموروث. وشروطه: ثلاثة: موت مورث حقيقة، أو حكما كمفقود، أو تقديرا كجنين فيه غرة ووجود وارثه عند موته حيا حقيقة أو تقديرا كالحمل الخ ( کتاب الفرائض، ج: 6، ص: 758، ط: سعید )۔
و فی ھامش مجمع الانھر: وشروطہ ثلاثۃ: موت مورث حقیقۃ او حکماً کمفقود او تقدیراً کجنین فیہ غرۃ و وجود وارثہ عند موتہ حیاً حقیقۃً او تقدیراً الخ ( کتاب الفرائض، ج: 2، ص: 745، ط: دار احیاء التراث العربی )۔
اس کےبعد واضح ہو کہ سائل کا مرحوم بھائی کا ترکہ اس کے موجودہ ورثاء میں اصول میراث کے مطابق اس طرح تقسیم ہوگا کہ مرحوم نے بوقتِ انتقال اپنی ملکیت میں جو کچھ منقولہ و غیر منقولہ مال و جائیداد سونا ،چاندی ، نقد رقم اور ہر قسم کا چھوٹا بڑا گھریلو ساز و سامان چھوڑا ہے، وہ سب مرحوم کا ترکہ ہے۔ اس میں سے سب سے پہلے مرحوم کے کفن دفن کے متوسط مصارف ادا کریں ، اس کے بعد دیکھیں کہ اگر مرحوم کے ذمہ کچھ قرض یا بیوہ کا حق مہر واجب الادا ہو تو وہ ادا کریں، اس کے بعد دیکھیں کہ اگر مرحوم نے کوئی جائز وصیت کی ہو تو بقیہ مال کے ایک تہائی ( 3/1) کی حد تک اس پر عمل کریں ، اس کے بعد جو کچھ بچ جائے ، اس کے کل چار (4)حصے بنائے جائے ، جن میں سے مرحوم کی بیوہ کو ایک (1) حصہ ،مرحوم کے موجود بھائیوں میں سے ہر ایک کو بھی ایک ایک( 1) حصہ دیا جائے ۔