ترکہ کی تقسیم اور تقسیمِ ترکہ میں رکاوٹ بننے کا حکم

جناب اعلیٰ!
گزارش یہ ہے کہ میں اشرف علی ولدیت حاجی حفیظ اللہ (مرحوم) میرا مسئلہ وراثت کا ہے، ہم چھ بھائی اور چار بہنیں ہیں، والد صاحب کا انتقال ہوئے ڈھائی سال ہو گئے ہیں اور الحمدللہ والدہ ابھی حیات ہے، اور والد صاحب کی زندگی میں ہم سب کا مشترکہ کاروبار تھا، سب بھائی کاروبار میں شریک تھے اورساتھ رہتے تھے ،مگر کچھ معاملات کی وجہ سے ہم علیحدہ ہو گئے، جب وراثت میں حصہ مانگا تو پتہ چلا کہ میرے نام پر کوئی پراپرٹی ہی نہیں ،اور موجودہ حالت آپ کے سامنے ہے ،گزشتہ کئی سالوں سے وراثت کو تقسیم کرنے کا مطالبہ کر رہا ہوں، لیکن میری اس بات پر کوئی توجہ نہیں دی جا رہی ہے جس کی وجہ سے میں کافی مالی مسائل کا شکار ہوں، آپ سے ان حالات میں میرے اوپر اور میرے گھر والوں بھائیو ں خصوصی طور پر میرے بڑے بھائی مبارک علی پر جن کو والد صاحب نے اپنی زندگی میں سب چیزوں کا نگران مقرر کیا تھا،کیا شرعی احکا مات لاگو ہوتے ہیں؟ رہنمائی فرمائیں، کیا ان کے لئےاس جائیداد اور کاروبار کو شرعی وراثت کی تقسیم کیے بغیر اپنے قبضے میں رکھنا جائز ہے؟ اور مجھ پر ان پر کیا احکامات ہیں شریعت کے مطابق ؟اور کیا وہ اس وراثت میں سے اپنے ذاتی اخراجات کر سکتے ہیں بغیر وارثوں کی اجازت کے؟
نوٹ:والد کے ورثاء میں بیوہ ،چھ بیٹے اور چار بیٹیاں موجود ہیں۔

الجوابُ حامِدا ًو مُصلیِّا ً

واضح ہو کہ وراثت کی تقسیم جتنی جلدی ممکن ہو ، اتنی جلدی تقسیم کرکے اس فریضہ سے سبکدوشی کی فکر کرنی چاہیئے ، تا کہ بعد میں کسی قسم کی بدمزگی ، آپس کے اختلافات ، لڑائی جھگڑے اور کسی کی حق تلفی کی نوبت نہ آئے، لہذا سائل کے والد مرحوم نے اگر سائل کےبڑے بھائی کو صرف نگران مقرر کیا تھا ،باقاعدہ کاروبار وغیرہ کا مالک نہیں بنایاتھا،تو ایسی صورت میں مذکور بھائی ترکہ کا مالک نہیں بنا ،بلکہ ترکہ میں تمام روثاء اپنے شرعی حصص کے حقدار ہیں، اور جتنا جلدی ممکن ہو ترکہ تقسیم کرکے ہر وارث کو اس کا شرعی حصہ دیکر اس فریضہ سے سبکدوشی کی فکر کرنی چاہیئے،بلاوجہ ٹال مٹول سے کام لینا اور ورثاء کے مطالبہ کے باوجود ترکہ کی تقسیم میں رکاوٹ بننا شرعاً جائز نہیں جس سے بہر صورت احتراز لازم ہے،بصورت دیگر سائل اپنے حق کی وصولی کے لئے قانونی چارہ جوئی بھی کر سکتا ہے۔
اس کے بعد واضح ہو کہ سائل کے والد مرحوم کا تر کہ اصولِ میراث مطابق ان کے موجود ورثاءمیں اس طرح تقسیم ہوگاکہ مرحوم نے بوقتِ انتقال جوکچھ منقولہ وغیرمنقولہ مال وجائیدادسونا ،چاندی ،زیورات ،نقد رقم اور ہر قسم کا چھوٹا بڑا گھریلو سازوسامان اپنی ملکیت میں چھوڑا ہے ،وہ سب مرحوم کا ترکہ ہے ، جس میں سے سب سے پہلے مرحوم کے کفن دفن کے متوسط مصارف ادا کریں ، اس کے بعد دیکھیں کہ اگر مرحوم کے ذمہ کوئی قرض یا بیوہ کا مہر واجب الادا ہو تو اسے ادا کریں، اس کے بعد دیکھیں کہ اگر مرحوم نے کوئی جائز وصیت کی ہو تو بقیہ مال کے ایک تہائی (1/3) کی حد تک اس پر عمل کرنے کے بعد جو کچھ بچ جائے، اس کے کل ایک سواٹھائیس(128) حصےبنائے جائیں ،جن میں سے مرحوم کی بیوہ کوسولہ (16)حصے ، مرحوم کےہر بیٹے کو چودہ (14)حصے اور مرحوم کی ہربیٹی کو سات (7)حصے دیےجائیں -

مأخَذُ الفَتوی

کما مشکوٰۃ المصابیح "عن سعيد بن زيد قال: قال رسول الله صلى الله عليه وسلم: «من أخذ شبراً من الأرض ظلماً؛ فإنه يطوقه يوم القيامة من سبع أرضين اھ".(باب الغصب والعارية، ج:1، ص 254 ،ط: قديمي)۔
وفی الدر المختار : (و قسم) المال المشترك (بطلب أحدهم إن انتفع كل) بحصته (بعد القسمة و بطلب ذي الكثير إن لم ينتفع الآخر لقلة حصته) و في الخانية : يقسم بطلب كل و عليه الفتوى ، لكن المتون على الأول فعليها العول (و إن تضرر الكل لم يقسم إلا برضاهم) لئلا يعود على موضوعه بالنقض. (ج6،ص 260،ط:سعید) -