بیماری سے شفایابی کے لیے وظیفہ

محترم جناب! میری والدہ گزشتہ دس مہینوں سے بیمار ہیں، الٹرا ساؤنڈ، خون ٹیسٹ کی رپورٹ درست ہیں ،لیکن وہ اپنے معمول کے حال پر نہیں ہیں، گزشتہ دس مہینوں سے ہلکی غذا استعمال کرتی ہیں، جیسے ساگودانہ،دلیہ وغیرہ دیگر غذاؤں کا تحمل نہیں کر سکتی اور نا اُمیدی کی کیفیت میں رہتی ہیں۔ براہِ کرم آپ میری رہنمائی فرمائیں اور بتائیں کہ میں کیا کروں؟الله آپ کو جزائے خیر عطاء فرمائے۔

الجوابُ حامِدا ًو مُصلیِّا ً

ہماری دعا ہے کہ ربِ کریم سائل کی والدہ کو شفاء کاملہ عاجلہ عطاء فرمائے اور سائل کی پریشانیوں کو دور فرما کر عافیت والا معاملہ فرمائے۔
تاہم ان کے معالجہ کا سلسلہ جاری رکھنے کے ساتھ ساتھ رجوع الی اللہ کا اہتمام کریں اور درج ذیل آیاتِ مبارکہ پڑھ کر پانی پر دم کر کے انہیں پلائیں اور ان کی صحت کی غرض سے صدقہ بھی کریں، ان شاء اللہ ضرور ان کے حق میں بہتری اور صحت کی صورتیں قائم ہونگی۔
”(۱){وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِلْمُؤْمِنِينَ} [الإسراء: ۸۲] (۲) {وَإِذَا مَرِضْتُ فَهُوَ يَشْفینِ}[الشعراء:۸۰] (۳) {وَيَشْفِ صُدُورَ قَوْمٍ مُؤْمِنِينَ} [التوبة: 14] (۴){وَشِفَاءٌ لِمَا فی الصُّدُورِ} [يونس:۵۷] “