اولاد کے حصول کے لیے وظیفہ

السلام علیکم! میری شادی کو تقریباً ساڑھے تین سال ہو گئے ہیں، اور اب تک ہماری کوئی اولاد نہیں ہے، جسے میں اللہ کی رضا سمجھتا ہوں، مگر میری زوجہ کی نظر میں کسی نے نظرِ بد کیا ہوا ہے، میں ایسا کیا کروں کہ میری بیوی کی غلط فہمی دور ہو جائے، کیو نکہ ڈاکٹروں کو بھی دکھا دیا ہے، وہ کہتے ہیں کہ سب ٹھیک ہے، اچھی غذا لیں ۔برائے مہربانی مجھے بتائیں میں کیا کروں؟

الجوابُ حامِدا ًو مُصلیِّا ً

میاں بیوی کو اولاد کی نعمت سے نوازنا یا محروم کرنا، اللہ تعالیٰ کی طرف سے ہوتا ہے، اس لیے اس پر پریشان ہونے کے بجائے صبر سے کام لینا چاہیئے، اور اس سلسلے میں اپنے گناہوں سے توبہ واستغفار کر کے نمازوں کی پابندی کا اہتمام کریں، اور اس کے ساتھ ساتھ فجر اور عشاء کی نماز کے بعد”رَبِّ هَبْ لِیْ مِن لَّدُنْكَ ذُرِّيَّةً طَيِّبَةً، إِنَّكَ سَمِيْعُ الدُّعَاءِ“اور”رَبِّ لَا تَذَرْنِىْ فَرْداً وَّأَنْتَ خَيْرُ الْوَارِثِيْنَ“اکیس اکیس(۲۱/۲۱)مرتبہ اول و آخر تین تین(۳/۳)مرتبہ درود شریف پڑھ کر دعا کریں، اور چالیس(۴۰)دن تک اس وظیفے کو جاری رکھیں اور اس دوران ازدواجی تعلق بھی قائم کرتے رہیں، تو ان شاء اللہ ضرور بہتری کی صورت بنے گی۔