میں نے ”ایم بی اے“ کیا ہے، نوکری کی بہت کوشش کی، مگر ناکام رہا، آخر کار پڑھانا شروع کر دیا، آج کل ٹویشن دیتا ہوں، آمدنی بہت قلیل ہے، شدید مالی مسائل کا شکار ہوں، نماز کی پابندی کرتا ہوں، فجر کے بعد”سورۂ یٰسین“پڑھتا ہوں اور ”سبحان اللہ و بحمدہ“والا وظیفہ کرتا ہوں اور عشاء کے بعد”سورۂ مزمل“ پڑھتا ہوں، اس کے علاوہ”لاحول“ والاورد بھی کرتا ہوں، مگر مسائل اپنی جگہ موجود ہیں، برائے مہربانی میری مدد فرمائیں۔
تمام مسائل کا حل رجوع الی اللہ اور گنا ہوں سے مکمل اجتناب میں ہے، اس لئے سائل کو چاہیے کہ مذکور امور اور پنجگانہ نمازوں کا اہتمام کرے، اور اس کے ساتھ مذکور وظائف اور اللہ تعالیٰ سے دعاؤں کا پورے یقین کے ساتھ اہتمام کرے، اورجلد بازی کا مظاہرہ نہ کرے، ہر کام کے لئے اللہ تعالیٰ کے ہاں وقت مقرر ہے، اس پر وہ ہو کر رہتے ہیں۔