کیا فرماتے ہیں علمائے کرام ان مسائل کے بارے میں کہ:۱۔ زید نے روزے کی حالت میں ہمبستری کی، جس کی وجہ سے اس کا روزہ باطل ہو گیا ،جب زید کو روزے کے کفارہ کا کہا تو زید کا کہنا ہے کہ مجھے معلوم نہیں تھا کہ اس طرح کرنے سے روزہ باطل ہو جاتا ہے، اور جہاں تک کفارے کا ذکر ہے تو میں اس کے ادا کرنے کی استطاعت نہیں رکھتا ہوں بایں طور پر کہ میں بہت غریب اور کمزور ہوں تو کیا فرماتے ہیں علمائے کرام کیا ایسے شخص پر کفارہ لازم ہے کہ نہیں قرآن وسنت کی روشنی میں راہ نمائی فرمائیں۔
۲۔ بکر اور خالد بھائی ہیں، بکر نے خالد کی زوجہ یعنی اپنی بھابھی سے بارہا منہ کالا کیا ہے ۔ (۱) تو کیا بکر کی اس حرکت کی وجہ سے خالدکے نکاح میں کچھ خلل واقع ہو گا یا نہیں ؟ (۲) اور بچہ کا نسب کس کے ساتھ ثابت ہوگا بکر کے ساتھ یا خالد کے ساتھ؟ (۳) بکر اپنی گھٹیا حرکت پر بہت نادم ہے۔ برائے مہربائی تفصیل سے وضاحت فرما کر بندے کو مشکور فرمائیں۔
مذکور شخص اور اس کی بیوی پر ہمبستری کے ذریعہ فاسد کیے ہوئے روزہ کی قضاء اور بطور کفارہ مسلسل دو ماہ روزے رکھنا اگر اس کی استطاعت نہ ہو تو پھر ساٹھ مسکینوں کو صبح و شام دو وقت پیٹ بھر کر کھانا کھلانا یا ہر مسکین کو دو سیر گندم یا اس کی قیمت دینا لازم ہے اس سلسلے میں اپنے آپ کو کمزور قرار دینا قطعاً نا جائز اور شیطانی دھوکہ ہے اس قسم کی حیلہ سازیوں سے احتراز لازم ہے۔
زنا کرنا ایک قبیح حرکت اور شرعا بھی ناجائز اور حرام ہے، جس پر شریعت مطہرہ نے حد شرعی نافذ کرنے کا حکم بیان فرمایا ہے جبکہ اپنی بھابھی کے ساتھ کرنے سے اس کی شناعت و قباحت مزید بڑھ جاتی ہے، جس کی وجہ سے ان دونوں پر بصدق دل تو بہ و استغفار اور آئندہ کے لیے ایسی حرکات سے مکمل اجتناب بھی لازم ہے۔
تاہم اس حرکت کی وجہ سے مذکور منکوحہ اپنے شوہر پر حرام یا اس کے نکاح سے نہیں نکلی اور پیدا ہونے والی اولاد بھی ثابت النسب ہی کہلائے گی، مگر آئندہ کے لیے باہم بے تکلفی کرنے اور مشترکہ رہائش رکھنے سے احتراز لازم ہے۔
شدید تھکن اور چکر آنے کی وجہ سے رمضان کا روزہ توڑنے کا کفارہ ادا کرنا
یونیکوڈ روزے کی قضاء و کفارہ 0