السلام علیکم؛ میری طبیعت خراب رہتی ہے ،مطلب میں اپنے شوہر کے ساتھ ازدواجی تعلقات نہیں بنا پاتی، بہت ڈاکٹر کو دکھایا، ٹھیک ہوجاتی ہوں، مگر پھر تکلیف ہوتی ہے، میرے شوہر کچھ کہتے نہیں ہیں، مگر کبھی چڑ جاتے ہیں تو مجھے اس پر گناہ ملے گا یا نہیں یا اگر آپ کے پاس کوئی حل ہو ؟
صورتِ مسئولہ میں اگر سائلہ واقعی بیماری اور جسمانی تکلیف کی وجہ سے شوہر کے ساتھ ازدواجی تعلق قائم نہ کرپاتی ہو اور اس بیماری کا علاج بھی کروارہی ہو ، تو اس مجبوری کی وجہ سے اس پر گناہ نہیں ہوگا ، البتہ شوہر کے ازدواجی حق کو اہم سمجھتے ہوئے حتی الامکان علاج اور مناسب تدبیر اختیار کرنا ضروری ہے،جبکہ سائلہ کے شوہر کو بھی چاہیے کہ بیوی کی بیماری اور مجبوری کو سمجھتے ہوئے اس کے ساتھ نرمی اور حسنِ معاشرت کا معاملہ کرے، لہٰذا محض شوہر کے کبھی کبھار ناراض ہوجانے کی وجہ سے سائلہ اپنے آپ کو گناہ گار نہ سمجھے؛ اگر واقعی عذرِ شرعی موجود ہو تو اس پر مؤاخذہ نہیں ہوگا، تاہم اگر بیماری کے باوجود شوہر کے حق کی ادائیگی ممکن ہو تو بلاوجہ مستقل گریز مناسب نہیں، جس سے احتراز چاہیے۔
کما فی الشامية: وفي الأشباه من أحكام غيبوبة الحشفة فيما يحرم على الزوج وطء زوجته مع بقاء النكاح قال: وفيما إذا كانت لا تحتمله لصغر أو مرض أو سمنة اهـ، وربما يفهم من سمنه عظم آلته. وحرر الشرنبلالي في شرحه على الوهبانية أنه لو جامع زوجته فماتت أو صارت مفضاة، فإن كانت صغيرة أو مكرهة أو لا تطيق تلزمه الدية اتفاقا. فعلم من هذا كله أنه لا يحل له وطؤها بما يؤدي إلى إضرارها فيقتصر على ما تطيق منه عددا بنظر القاضي أو إخبار النساء، وإن لم يعلم بذلك فبقولها اھ (فصل فی المحرمات، باب القسم بین الزوجات، ج:3، ص:204، ط:سعید)۔