بیوی کا شوہر سے ہر حال میں الگ گھر کا مطالبہ کرنا

محترم جناب مفتی صاحب ! السلام علیکم ورحمۃ اللہ وبرکاتہ
میں ایک اہم مسئلے میں شرعی رہنمائی کا خواہش مند ہوں، میری شادی کو تقریباً ڈیڑھ سال ہو چکا ہے، میری اہلیہ اور سسرالی رشتہ دار شادی کے چھ ماہ بعد سے مسلسل الگ گھر میں رہنے کا مطالبہ کر رہے ہیں، اس وجہ سے متعدد بار گھریلو ماحول کشیدہ ہو چکا ہے، میری گھریلو ذمہ داریاں کچھ اس طرح ہیں کہ میرے والد صاحب کئی بیماریوں کی وجہ سے چلنے پھرنے اور کام کاج کرنے سے قاصر ہیں، میری غیر موجودگی میں ان کی دیکھ بھال میری والدہ اور غیر شادی شدہ بہن کرتی ہیں، میرے ساتھ میرا چھوٹا بھائی بھی رہتا ہے، جو ابھی مالی طور پر خودکفیل نہیں ہے، میں نے ارادہ کیا ہے کہ بھائی کی شادی کروا کر اُسے علیحدہ کر دوں، تاکہ وہ اپنی ازدواجی زندگی شروع کر سکے، اور میں اپنے والدین کو اپنے ساتھ رکھوں، کیونکہ ان کی خدمت اور مالی ذمہ داریاں میرے ہی ذمہ ہیں، میرا اصل منصوبہ یہ تھا کہ ایک بڑا گھر لے کر سب کو اکٹھا رکھوں، تاکہ والدین کی خدمت بھی ہو اور ازدواجی زندگی بھی سکون سے گزرے، لیکن سسرالی دباؤ کی وجہ سے مجھے بھائی کو الگ کرنا پڑ رہا ہے، تاکہ اہلیہ کا مطالبہ کسی حد تک پورا ہو سکے، جب میں اس حوالے سے بات کرتا ہوں تو سسرالی یہ کہتے ہیں کہ انہیں میرے والدین یا بہن بھائیوں سے کوئی مسئلہ نہیں، لیکن عملی طور پر صورت حال اس کے برعکس ہے، مالی لحاظ سے الحمدللہ اللہ کا خاص فضل ہے، اور میری اہلیہ کے جتنے بھی حقوق ہیں، وہ میں پوری کوشش سے ادا کر رہا ہوں، اس کے باوجود میری اہلیہ کا میرے والدین، بہن اور بھائی کے ساتھ رویہ مناسب نہیں ہوتا، چھوٹی چھوٹی باتوں کو وہ مسئلہ بنا دیتی ہیں، اور فوراً اپنے گھر والوں کو ان معاملات میں شامل کر لیتی ہیں، جو بعد میں مجھ سے آ کر براہِ راست بات کرتے ہیں جسے میں بالکل غیر مناسب اور غیر ضروری سمجھتا ہوں، میں نے کبھی اپنے والدین یا گھر والوں کو ان معاملات میں شامل نہیں کیا، تاکہ ہمارے خاندان کی طرف سے ماحول خراب نہ ہو، لیکن دوسری طرف سے اکثر غیر ضروری مداخلت کی جاتی ہے، مزید عرض یہ ہے کہ جب میں اہلیہ یا سسرالیوں سے معاملہ سلجھانے کی کوشش کرتا ہوں اور یہ کہتا ہوں کہ میں بھائی کو علیحدہ کر رہا ہوں اور والدین کو اپنے ساتھ رکھوں گا، تو اس کے باوجود وہ یہی جواب دیتے ہیں کہ ہمیں آپ کے بھائی، بہن یا والدین سے کوئی مسئلہ نہیں، لیکن ہم علیحدہ ہی رہیں گے، ہمیں اپنی پرائیویسی اور سکون چاہئیے، اور وہ تبھی ممکن ہے جب ہم مکمل طور پر الگ گھر میں رہیں، آپ بھی الگ ہوں، اور اپنے والدین، بھائی اور بہن کو الگ کر دیں۔ میرا سوال یہ ہے کہ کیا والدین کو اس حالت میں، جبکہ وہ بیمار اور ضعیف ہیں، چھوڑ دینا شرعاً جائز ہے؟ یا بیوی یا سسرالی دباؤ کی وجہ سے والدین اور بہن بھائی کو تنہا چھوڑ دینا درست ہے؟ اور کیا بیوی کا مسلسل یہ مطالبہ کرنا کہ شوہر اپنے والدین، بہن بھائی سے الگ ہو جائے، شریعت کی روشنی میں قابلِ قبول ہے؟ میں اپنی استطاعت کے مطابق سب کو ساتھ رکھنے کی کوشش کر رہا ہوں، مگر مسلسل دباؤ اور ضد نے مجھے دینی و ذہنی طور پر بہت پریشان کر دیا ہے۔ براہِ کرم شریعت کی روشنی میں میری رہنمائی فرمائیں۔ جزاکم اللہ خیراً

الجوابُ حامِدا ًو مُصلیِّا ً

واضح ہو کہ شوہر کے ذمہ جس طرح بیوی کے حقوق ادا کرنا لازم ہے ، اسی طرح بیٹا ہونے کے ناطے والدین کے حقوق بھی اس کے ذمہ ادا کرنا لازم ہے، لہٰذا سائل کو چاہئیے کہ اپنی بیوی کو مناسب طریقے سے سمجھائے کہ وہ بلاوجہ اپنے ذاتی معاملات میں اپنے گھر والوں کو ہر گز شامل نہ کرے، اور سائل کے سسرال والوں پر بھی لازم ہےکہ سائل کی ازدواجی زندگی میں بے جا مداخلت نہ کریں، لہذا سائل نے اگر اسی گھر میں بیوی کو ایک کمرہ مہیا کر رکھا ہو جس میں گھر کے دیگر افراد اس کی اجازت و مرضی سے داخل نہ ہو سکتے ہوں تو اس صورت میں الگ رہائش کا مطالبہ شرعاً جائز نہیں، جس سے احتراز چاہیئے۔ جبکہ سائل کو بھی چاہییے کہ وہ صبر وتحمل کے ساتھ بیوی، بچوں، والدین، بھائی اور بہنوں کے درمیان معاملات میں توازن قائم کرنے کی کوشش کرے، بلاوجہ کسی ایک کی طرف داری اور حمایت سے گریز کرے اور تمام کے حقوق یکساں طور پر عدل و انصاف کے ساتھ ادا کرنے کی کوشش جاری رکھے، اس کی مخلصانہ کوششوں سے جلد حالات درست ہو جائیں گے۔ انشاء اللہ

مأخَذُ الفَتوی

کما فی الجامع الاحکام القرآن: قولہ تعالیٰ: ( اما یبلغن عندک الکبر احدھما أو کلاھما ) خص حالۃ الکبر لانھا الحالۃ التی یحتاجان فیھا الی برہ، لتغیر الحال علیھما بالضعف والکبر، فالزمہ فی ھذہ الحالۃ من مراعاۃ احوالھما اکثر مما الزمہ من قبل، لانھما فی ھذہ الحالۃ قد صارا کلا علیہ، فیحتاجان ان یلی منھما فی الکبر ما کان یحتاج فی صغرہ ای یلیا منہ الخ (سورۃ بنی اسرآئیل ، آیۃ : 33 ، ط: دارالعلم)ـ
وفی الدر المختار : بيت منفرد من دار له غلق زاد في الاختيار والعيني ومرافق ومراده لزوم كنيف ومطبخ وينبغي الإفتاء به بحر (کفاھا) لحصول المقصود ھدایۃ ؛ و فی البحر عن الخانیۃ الخ
وفی رد المحتار : تحت : (قوله وفي البحر عن الخانية) عبارة الخانية فإن كانت دار فيها بيوت وأعطى لها بيتا يغلق ويفتح لم يكن لهاأن تطلب بيتا آخر إذا لم يكن ثمة أحد من أحماء الزوج يؤذيها اھ قال المصنف في شرحه فهم شيخنا أن قوله ثمة إشارة للدار لا البيت لكن في البزازية أبت أن تسكن مع أحماء الزوج وفي الدار بيوت إن فرغ لها بيتا له غلق على حدة وليس فيه أحد منهم لا تمكن من مطالبته ببيت آخر الخ (باب النفقۃ ، ج: 3 ، ص: 600 ، ط: سعید)۔
وفی الھندیۃ : امرأۃ ابت ان تسکن مع ضرتھا او مع احمائھا کامۃ و غیرھا فان کان فی الدار بیوت وفرغ لھا بیتاً وجعل لبیتھا غلقا علی حدۃ لیس لھا ان تطلب من لزوج بیتا آخر فان لم یکن فیھا الا بیت واحد فلھا ذلک وان قالت لا اسکن مع امتک لیس لھا ذلک الخ (الفصل الثانی فی السکنیٰ، ج:1 ، ص: 556 ، ط: ماجدیۃ)۔