شوہر کا بیوی کے حقوق ادا نہ کرنا

میری 23 سال عمر تھی جب میری شادی ہوئی ، میں ایک گود لی ہوئی لڑکی ہوں، میرے والدین نے مجھے گود لیا ہے،میرے ماں باپ کی کوئی اور اولاد بھی نہیں ہے ،میں اپنے ماں باپ کو کسی جگہ پہ پڑی ہوئی ملی تھی مجھے اپنے اصل ماں باپ کا بھی نہیں پتہ کہ وہ کہاں ہیں اور کون ہیں،شادی سے پہلے میرے سامنے دو انتخاب رکھے گئے تھے یا تو تم تایا کے بیٹے سے شادی کر لو یا پھر ماموں کے بیٹے سے شادی کر لو، میں نے ماموں کے بیٹے سے شادی کی کیونکہ میری والدہ کی تایا کے بیٹے سے میری شادی پر رضامندی نہیں تھی، وہ اس لیے رضامند نہیں تھی کیونکہ وہ چاہتی تھی کہ ساری زندگی میرے تایا لوگوں نے میرے ماموں لوگوں کو گھر میں آنے نہیں دیا یا ان کو عزت احترام نہیں دیا، اس لیے انہوں نے میری شادی میرے ماموں کے بیٹے کے ساتھ کروا دی تاکہ ان کا گھر آنا جانا لگا رہے،میرا تعلق مالی طور پر مضبوط خاندان سے ہے،جس شخص سے میں نے شادی کی وہ 12ویں پاس تھا اور مالی طور پر بھی مضبوط نہیں تھا،میں شہر میں پلی بڑھی اور وہ گاؤں میں پلا بڑھا تھا۔میں اس سے اس لیے شادی نہیں کرنا چاہتی تھی کہ وہ مجھ سے تین سال چھوٹا تھا اور گاؤں میں پلا بڑھا تھا اور میرے حساب کے مطابق جتنا میں پڑھی لکھی ہوں اتنا پڑھا لکھا بھی نہیں تھا۔میں نے بار بار اپنی والدہ سے کہا کہ میں شادی کرنے کو تیار نہیں ہوں اور انہوں نے مجھے کہا کہ اگر آپ اپنے والد کو بتائیں کہ آپ شادی نہیں کریں گے یا آپ کو اپنی پسند کی شادی کرنی ہوگی۔ تو وہ کہیں گے کہ آپ کو گود لیا گیا ہے اس لیے آپ اپنی مرضی کی شادی کرنا چاہتی ہیں لیکن میری کوئی مرضی بھی نہیں تھی کہ میں یہاں پہ شادی کرنا چاہتی ہوں بس میں اس انسان کے ساتھ شادی نہیں کرنا چاہتی تھی ۔شادی سے پہلے میں نے یہ سوچا تھا کہ میں شادی کے بعد اس انسان سےطلاق لے لوں گی اور میں نہیں رہوں گی اگر میں رہوں گی بھی تو اپنے ماں باپ کی زندگی تک ان کی عزت کے خاطر رہوں گی ۔خیر میں نے اپنے ماں باپ کی عزت کی خاطر نکاح کر لیا اس لڑکے کے ساتھ جس سے میں شادی نہیں کرنا چاہتی تھی میں رضامند نہیں تھی۔نکاح کے بعد میں نے یہ سوچا کہ میں اللہ کی رضا کے لیے اس انسان کے ساتھ زندگی گزاروں گی۔لیکن میں نے وقت کے ساتھ ساتھ دیکھا کہ وہ میری پرواہ ہی نہیں کرتا نہ میرا خیال رکھتا ہے۔وہ رات کو میرے ساتھ ایسے ہم بستری کرتا ہے جیسے زیادتی کر رہا ہو میرے ساتھ۔ میں ایک سال میں دو بار حاملہ ہوئی ہوں اور بچے کی اچھی نشوونما نہیں ہو پائی جس کی وجہ سے میرا حمل ضائع ہو گیا۔ایک سال ہو گیا ہے شادی کو میرے خاوند نے کبھی نماز بھی نہیں پڑھی نہ جمعہ پڑھنے جاتا ہے اور نہ کبھی اس نے قرآن کھول کے دیکھا ہے، صرف روزہ رکھ لیتا ہےرمضان میں وہ بھی اس لیے کیونکہ میری ماں اس کو زبردستی روزہ رکھواتی ہیں۔وہ لڑکا اپنی صاف ستھرائی کا بھی خیال نہیں رکھتا۔جہاں چار لوگ بیٹھے ہوں وہاں پہ میرا خاوند میری عزت بھی نہیں کرتا، بدتمیزی سے بات کرتا ہے۔ان سب باتوں کو دیکھتے ہوئے میں نے یہ سوچا کہ میں اس لڑکے کے ساتھ اب نہیں رہوں گی اس سے طلاق لے لوں گی۔.اور میں نے بارہاں ہوش و حواس میں اپنے خاوند کو بھی بولا کہ وہ مجھے طلاق دے دے اس نے کہا کہ میں دے دوں گا بہت جلد لیکن وہ نہیں دے رہا۔اور میں نے اپنے ماں باپ کو بھی کہا کہ میں اس لڑکے کے ساتھ خوش نہیں ہوں ان لوگوں نے کہا کہ پاگلوں کے ساتھ بھی تو زندگی گزاری جاتی ہے تم گزار لو زندگی ہماری عزت کی خاطر، اور اب میرا سوال آپ سے یہ ہے کہ نہ تو اب میں اپنے ماں باپ کی عزت کی خاطر کورٹ میں اکیلی جاسکتی ہوں کہ میں اس لڑکے سے طلاق لے سکوں. اور نہ میرا خاوند مجھے خود طلاق دے رہا ہے، میرے بار ہا کہنے کے بعد بھی مجھے طلاق نہیں دے رہا ،وہ چاہتا ہے کہ میرے ماں باپ ہی میرا فیصلہ کریں اور میرے ماں باپ میرا فیصلہ نہیں کر رہے ہیں۔ اب میں یہ پوچھنا چاہتی ہوں کہ اسلام میرے حق میں کیا کہتا ہے؟ کیا میں اس کے نکاح میں ہوں یا نہیں ؟ یا میں اس کے ساتھ ایسے ہی زندگی گزاروں جیسے گزر رہی ہے؟

الجوابُ حامِدا ًو مُصلیِّا ً

سوال میں درج کردہ بیان اگر واقعۃً درست اور مبنی بر حقیقت ہو اور اس میں کسی قسم کی غلط بیانی اور مبالغہ آرائی سے کام نہ لیا گیا ہو تو سائلہ کے شوہر کا مذکور طرزِ عمل انتہائی درجہ نامناسب اور غیر اخلاقی ہے ، اس پر لازم ہے کہ اپنے مذکور طرزِ عمل سے باز آکر سائلہ کے حقوق ادا کرنے کی فکر کرے، جبکہ سائلہ کو بھی چاہیئے کہ از خود یا خاندان کے بڑوں کے ذریعے حکمت وبصیرت کے ساتھ اپنے شوہر کو سمجھانے اور مذکور رویہ سے باز رکھنے کی کوشش کرے ، اور ساتھ ساتھ اس کی اصلاح کے لئے دعاؤں کا بھی اہتمام کرے ، انشاءاللہ امید ہے کہ وہ اپنے مذکور طرز ِعمل سے باز آجائے ، تاہم اگر سائلہ کا شوہر باوجودسمجھانے کےمذکور طرز عمل سے باز نہ آتا ہو ، اور اس کے اس رویہ کی وجہ سائلہ کے لئے حدوداللہ کی پاسداری کرتے ہوئے اس کے ساتھ نباہ ممکن نہ ہو ، تو ایسی صورت میں سائلہ کے لئےشوہر سے طلاق یا خلع بالمال کے ذریعے علیحدگی حاصل کرنے کی گنجائش ہوگی، اور اس کی وجہ سے وہ گناہ گار بھی نہ ہو گی، تاہم شوہر سے طلاق یا خلع لیے بغیر خود بخود یہ نکاح ختم نہیں ہوگا۔

مأخَذُ الفَتوی

قال الله تعالٰی: ﴿وعاشروهن بالمعروف﴾ [الآیة: النساء]
وقال تعالٰی: ﴿فإن خفتم الا یقیما حدود الله فلا جناح علیهما فیما افتدت به﴾ [البقرة)
وفی الفقه الإسلامی: ان كانت الزوجة كارهة زوجها لقبح منظر او سوء عشرة وخافت ألا تؤدی حقه جاز للزوج مخالعتها واخذ عوض فی نظیر طلاقها لكن یكره عند الحنفیة ان یاخذ منها اكثر مما اعطاها. (ج۹، ص۷۰۲۹)
وفیه ایضًا: وان كان الكره من الجانبین وخشیا التقصیر او التفریط فی حقوق الزوجیة جاز الخلع وجاز اخذ البدل اتفاقا لقوله تعالٰی فان خفتم الا یقیما حدود اله فلا جناح علیهما فیما افتدت به. (ج۹، ص۷۰۲۹)