"پے ڈائمنڈ"نامی کمپنی کے ساتھ کاروبار کرنے کا حکم

السلام علیکم !
ایک کمپنی جس کا نام ہے ’’ڈائمنڈ ‘‘ہے ، اس میں ایک اسکیم ہے ،جس میں ہم کچھ رقم انویسٹ کرتے ہیں ،اور کمپنی ہمارے پیسے ڈائمنڈ ز کے بزنس پر لگاتی ہے، اور پروڈکٹس تیار کر کے بیچتی ہے ، اور انویسٹ کرنے والے کو انویسٹ کیے گئے پیسوں کا پانچ فیصد ہر ہفتے دیتی ہے، اور یہ سلسلہ پچیس ہفتوں تک چلتا ہے ، پھر کمپنی ہمارے پیسوں کا ڈائمنڈ تیار کر کے ہمیں میل کر کے پوچھتی ہے کہ کیا آپ یہ ڈائمنڈ لیناچاہتے ہیں ،یا ہم اسے آپ کی طرف سے بیج دیں ،اور ا آپ کو مزید پچیس ہفتے منافع ملتا رہے گا؟ یعنی اگر ہم نے بیس ہزار روپے دیے ہیں، تو کمپنی ہمیں ہر ہفتے ایک ہزار روپے دیتی ہے ، یعنی پورے سال میں یہ پینتالیس ہزار بنتے ہیں، یعنی ہمارے اپنے پیسے بھی واپس آ جاتے ہیں اور ایک سو پچاس فیصد نفع بھی ملتا ہے ؟ تو کیا اس کمپنی میں کام کرنا حلال ہے؟ برائے مہربانی جواب ضرور دیجیےگا؟ اللہ آپ کو خوش رکھے ۔

الجوابُ حامِدا ًو مُصلیِّا ً

سوال میں ذکر کردہ ’’پے ڈائمنڈ‘‘ نامی کمپنی کے بارے میں دارالافتاء دارالعلوم کراچی سے رابطہ کرنے سے معلوم ہوا کہ اس کمپنی کے طریقہ کار کے بارے میں وہاں متعدد بار غور و فکر کیا جا چکا ہے، جس کے نتیجہ میں یہ بات واضح ہوئی ہے کہ مذکورہ کمپنی کے طریقہ کار میں سود اور اس جیسی متعدد خرابیاں پائی جاتی ہیں ، جس کی بنا پر وہاں کے مفتیانِ کرام نے یہ فیصلہ کیا کہ مذکورہ کمپنی کا طریقہ کار شرعاً جائز نہیں ، اس لئے ان پر اعتماد کرتے ہوئے ہماری رائے میں بھی مذکور کمپنی کے ساتھ کاروبار میں شرکت کرنے سے احتراز کرنا چاہیئے۔