السلام علیکم ورحمۃ اللہ وبرکاتہ!
کیا فرماتے ہیں علمائے کرام اس مسئلے کے بارے میں کہ میں ایک ایسی مارکیٹنگ ایجنسی میں کام کرتا ہوں جو کہ مختلف کمپنیز کے لئے ڈاونلوڈر بڑھانے کے لیے کام کر کے پیسے وصول کرتی ہیں۔ جس کا طریقہ یہ ہوتا ہے کہ ہماری ایجنسی ایسے لوگوں کے نمبر نکالتی ہے جو کہ فوت ہو چکے ہوں یا ایسے نمبر ز نکالتے ہیں جو کسی کے استعمال میں نہ ہوں ۔ پھر وہ نمبر ہمیں دیے جاتے ہیں ہم ان نمبرز پر اکاؤنٹ بنا کر اس اصل کمپنی کی ایپ کو ڈاونلوڈ کرتے ہیں جس سے اس کمپنی کے ایکٹو ممبرز بڑھ جاتے ہیں۔ اس نمبر پر ہم جو اکا ؤنٹ بنا کر ڈاونلوڈ کرتے میں تو اکاؤنٹ کا ویریفکیشن کمپنی کے پاس جاتے ہیں اور کمپنیی کے اے آئی سسٹم کو معلوم ہو جاتا ہے کہ یہ ٹمپریری اور عارضی نمبر ہیں جس کی بنیاد پر اے ائی سسٹم ان ویریفکیشن کے لیے جانے کو ڈیلیٹ کر دیتا ہے، لیکن چونکہ ہم اپنا کام کر چکے ہوتے ہیں لہذا ہمیں پیسے مل جاتے ہیں۔ یہ اکاؤنٹ جس پر ایپ کو ڈاونلوڈ کیا گیا ہے اس کا لاگ ان) صرف ہمارے پاس ہوتا ہے کسی کو نہیں دے سکتے -اور ہم نے جس اکاونٹ سے ایپ کو ڈاؤنلوڈ کیا ہے وہ 2 سے 3 مہینے میں اس اکاؤنٹ کو کمپنی ڈیلیٹ کر دیتی ہے۔ لہذا اس میں نہ ہمارا نقصان ہے نہ کسی اور کا ، صرف کمپنی کے ممبرز بڑھ جاتے ہیں۔
جیسے ہم بینک کی ایپ بناتے ہیں تو لاگ ان کرنے کے بعد کچھ دیر کے لئے اکاؤنٹ ویریفائی ہونے کے لیے رک جاتا ہے ہم اسکو استعمال نہیں کرتے۔
اسی طرح اس کمپنی کے پاس جاتا ہے تو کمپنی اسکو ویریفائی ہی نہیں کرتی عارضی نمبرز آنے کی وجہ سے۔ لیکن چونکہ ایک بار ایک ڈاؤن لوڈ ہو گئی تو ہمیں پیسے مل جاتے ہیں۔
کیا ایسا کرنا صحیح ہے. اگر صحیح نہیں ہے تو وجہ ارشاد فرما دیں اور ساتھ ہی اس کا شرعی حل بھی بتا دیں۔
جزاکم اللہ خیرا
سوال میں ذکر کردہ تفصیل کے مطابق مذکور ایجنسی کا مختلف عارضی طور پر ناقابلِ استعمال نمبروں کو نکالنے اور اس پر جعلی اکاؤنٹ بناکر اس پر متعلقہ ایپ ڈاؤنلوڈ کرنے کا مقصد جعل سازی کے ذریعے ریٹنگ بڑھانا ہے ، تاکہ اس سے اس ایپ کی مارکیٹنگ ہو اور اس کے ذریعے سے ممبرز بڑھے اور لوگ اس ایپ کو زیادہ سے زیادہ ڈاؤنلوڈ کرے ، مذکور طریقہ کار چونکہ جعل سازی اور دھوکہ دہی پر مبنی ہے ، اس لیے اس سے احتراز کرنا لازم ہے ۔ اس کی جائز متبادل صورت یہ ہے کہ ایجنسی بند نمبروں کو نکال کر اس پر جعلی اکاؤنٹ بنانے کے بجائےتشہیر کی بنیاد پر صارفین سے حقیقی اکاؤنٹس بنوائے ، تاکہ اس کے ذریعے حقیقی صارفین اور ڈاؤن لوڈز کی تعداد زیادہ ہو ، ایسی صورت میں ایجنسی کے ساتھ کام کرنا اور اس پر اجرت لینا جائز ہے۔
[صحيح البخاري: قال النبي صلى الله عليه وسلم الخديعة في النار ومن عمل عملا ليس عليه أمرنا فهو رد. [كتاب البيوع، باب النجش (3/ 69) ط: السلطانية]