السلام علیکم ورحمۃ اللہ وبرکاتہ
میرا تعلق ایک شہید کی فیملی سے ہے۔ میرے والد صاحب پاک آرمی میں تھے اور دورانِ ڈیوٹی شہید ہوئے۔ حکومت کی طرف سے شہداء کی بیواؤں کے لیے National Savings میں ایک مخصوص اکاؤنٹ کھولا جاتا ہے جسے Shuhada Family Welfare Account (SFWA) کہا جاتا ہے۔
مجھے اس اکاؤنٹ کے شرعی حکم کے بارے میں وضاحت درکار ہے، کیونکہ میں سود سے مکمل طور پر بچنا چاہتا/چاہتی ہوں۔
اس اکاؤنٹ کے بارے میں میری معلومات یہ ہیں:
1. یہ اکاؤنٹ عام لوگوں کے لیے نہیں بلکہ صرف شہداء کے اہلِ خانہ، خصوصاً شہید کی بیوہ، کے لیے مخصوص ہے۔
2. حکومت اس اسکیم کو شہید کے خاندان کی مالی کفالت اور فلاح و بہبود کے لیے قرار دیتی ہے۔
3. اس اکاؤنٹ میں رقم جمع کروائی جاتی ہے اور اس رقم پر حکومت کی طرف سے ایک مقررہ شرح (fixed rate) کے مطابق منافع دیا جاتا ہے۔
4. منافع ماہانہ بنیاد پر ادا کیا جاتا ہے اور اس کا حساب اکاؤنٹ میں موجود رقم کے مطابق ہوتا ہے۔
5. منافع کی شرح حکومت/وزارتِ خزانہ کی طرف سے مقرر کی جاتی ہے اور وقتاً فوقتاً تبدیل بھی ہو سکتی ہے۔
6. چونکہ یہ رقم شہید کی فیملی کی کفالت کے لیے ہے اور اکاؤنٹ بھی صرف شہداء کی بیواؤں کے لیے مخصوص ہے، اس لیے میرے ذہن میں یہ سوال ہے کہ آیا اس میں ملنے والا منافع عام بینک یا نیشنل سیونگز کے سودی منافع سے مختلف شرعی حیثیت رکھتا ہے یا نہیں۔
براہِ کرم درج ذیل سوالات کا واضح جواب عنایت فرمائیں:
(1) کیا Shuhada Family Welfare Account میں اپنی رقم رکھنا شرعاً جائز ہے؟
(2) اس اکاؤنٹ پر ملنے والا مقررہ ماہانہ منافع سود (ربا) کے حکم میں ہے یا شرعی طور پر جائز منافع/کفالت ہے؟
(3) اگر یہ جائز ہے تو براہِ کرم اس کی شرعی بنیاد اور وجہ بھی بیان فرمائیں کہ مقررہ شرح سے ملنے والی رقم سود کیوں نہیں ہے۔
(4) اگر یہ سود کے حکم میں ہے تو کیا شہید کی بیوہ یا اس کے اہلِ خانہ کے لیے اس میں کوئی شرعی رعایت یا الگ حکم ہے، کیونکہ حکومت اسے شہداء کے خاندان کی کفالت کے لیے فراہم کرتی ہے؟
(5) اگر اس اکاؤنٹ کا منافع شرعاً جائز نہیں، تو کیا شہید کی بیوہ کے لیے حکومت کی طرف سے کوئی حلال/شرعی متبادل موجود ہے جس میں رقم رکھ کر جائز منافع حاصل کیا جا سکے؟
براہِ کرم اسی Shuhada Family Welfare Account (SFWA) کے موجودہ طریقۂ کار اور شرائط کو سامنے رکھتے ہوئے فتویٰ عنایت فرمائیں، تاکہ میں اطمینان کے ساتھ فیصلہ کر سکوں۔
جزاکم اللہ خیراً
واضح ہو کہ قرض پر معروف یا مشروط نفع شرعاً سود کے زمرے میں آتا ہے، خواہ یہ معاملہ بیوہ اور یتیم بچوں کی کفالت ہی کے لیے کیوں نہ ہو۔ لہٰذا صورتِ مسئولہ میں شہداء فیملی ویلفیئر اکاؤنٹ (Shuhada Family Welfare Account) میں جمع شدہ رقم پر مقررہ شرح کے مطابق ماہانہ جو اضافی رقم ادا کی جاتی ہے، اگر یہ اضافی رقم قرض کے بدلے مشروط نفع کے طور پر دی جاتی ہے تو یہ سود کے حکم میں داخل ہے اور اسے حاصل کرنا جائز نہیں۔ البتہ حکومت کی طرف سے شہداء کے اہلِ خانہ کو بطورِ امداد یا پنشن دی جانے والی رقم جائز ہے، خواہ براہِ راست دی جائے یا ان کے اکاؤنٹ میں منتقل کی جائے۔نیز اپنی رقم پر جائز منافع حاصل کرنے کے لیے سائلہ کسی مستند اسلامی بینک کے شرعی اصولوں کے مطابق چلنے والے مضاربہ یا دیگر جائز سرمایہ کاری اکاؤنٹ سے استفادہ کرسکتی ہیں۔البتہ شہداء فیملی ویلفیئر اکاؤنٹ (Shuhada Family Welfare Account) کا حتمی شرعی حکم متعین کرنے کے لیے اس کی شرائط اور معاہدے کی تحقیق ضروری ہے۔ لہٰذا سائلہ اس کی مکمل تفصیلات اور متعلقہ دستاویزات ارسال کردیں، تاکہ ان کی روشنی میں حتمی شرعی حکم سے آگاہ کیا جاسکے۔