کیا شرعی وارث کے حق میں وصیت کی جا سکتی ھے؟ میرے والد صاحب نے اپنی وصیت میں اپنی وراثت کا 2/3 سے زائد ایک ہی بیٹے کے نام کر دیا ،اور باقی دو بیٹوں اور دو بیٹیوں کو کچھ نہیں دیا۔ اس کو مزید یقینی بنانے کیلیے انہوں نے اپنی زندگی میں ہی ایک شہری مکان جس کی مالیت کل وراثت کا تقریباً 80 فیصد بنتی ھے اپنے ایک بیٹے کو ھبہ کیا اور قبضہ بھی نہیں دیا۔ ایسی صورت میں کیا یہ ھبہ جائز ھے؟
واضح ہو کہ وارث کے حق میں وصیت شرعاً معتبرنہیں ہوتی،اور نہ ہی دیگر ورثاء کی رضامندی اور اجازت کے بغیر اس پر عمل کیا جاسکتاہے، لہذا سائل کے والد نے اپنے ایک بیٹے کے حق میں جو وصیت کی ہے تو یہ وصیت وارث کے حق میں ہونے کی وجہ سے معتبر نہیں ، بلکہ اس کے دنیا سے جانے کے بعد کل ترکہ اس کے انتقال کے وقت موجود تمام ورثاء میں اصول میراث کے مطابق تقسیم کرنا لازم ہوگا،جس کی تفصیل بوقت ضرورت ورثاء کی تعداد بتاکر معلوم کی جاسکتی ہے۔
جبکہ ہبہ مکمل ہونے کیلئےشرعاً قبضہ( کہ جس کو ہبہ کیا گیا ہے وہ اس میں جس طرح چاہے تصرف کرسکے) دینا شرط ہے،لہذا گر سائل کے والد نے اپنے ایک بیٹے کو ایک شہری مکان میں ہبہ کردہ حصہ باقاعدہ الگ کرکے مالکانہ قبضہ وتصرف کے ساتھ اس کے حوالہ نہ کیا ہو تو یہ ہبہ بھی شرعاً مکمل شمار نہیں ہوگا بلکہ یہ مکمل مکان بدستور اس کی کلی ملکیت کہلائیگی، جو اس کے انتقال کے بعد تمام ورثاء میں تقسیم ہوگا۔
کما فی مرقاۃ المفاتیح: ويروى عن ابن عباس - رضي الله عنهما - عن النبي - صلى الله عليه وسلم - قال: «لا وصية لوارث، إلا أن يشاء الورثة» اھ ( باب الوصایا ج 5 رقم الحدیث: 3074 )۔
و فی الدر المختار: (وتتم) الهبة (بالقبض) الكامل الخ ( کتاب الھبۃ ج 5 ص 690 ط: سعید)۔
و فی الھندیۃ: ومنها أن يكون الموهوب مقبوضا حتى لا يثبت الملك للموهوب له قبل القبض الخ ( کتاب الھبۃ ج 4 ص 374 ط: ماجدیۃ)-