دھوکہ دہی سے حاصل کی ہوئی رقم کاحکم

السلام علیکم! جناب: امید رکھتا ہوں کہ آپ بخیریت ہونگے۔
دوسال پہلے مبلغ 22000روپے کی ایک LED میں نے خریدی ، جس کے ساتھ ایک سال کی وارنٹی دی گئی، 4 ماہ بعد اس کی سکرین ایک معمولی ضرب کی وجہ سے ہلکی سی خراب ہوئی ، لیکن سکریچ اس قدر معمولی تھا کہ ہم ڈیلر کو قائل کرنے میں کامیاب ہوئے، کہ اس کو کوئی ضر ب نہیں لگی، اور اس کو تبدیل کراکے نئی LED حاصل کرلی، جو اب تک استعمال میں ہے، ایک عرصہ بعد اب یہ احساس ہوا ہے کہ رقم کے نقصان کی فکر میں شدیدی دھوکہ دہی واقع ہوگئی تھی، اب صوت حال یہ ہے کہ اگر ڈیلر سے رابطہ کریں، تو اس کی قانونی چارہ جوئی اور بے عزتی سے خوف آتا ہے، دل میں ایک شک یہ بھی ہے کہ شاید وہ ڈیلر پیسے رکھ لے گا، اور جس کمپنی کا نقصان ہوا ہے اس تک یہ رقم نہ پہنچ پائے، کیا یہ رقم صدقہ کرکے اس دھوکہ دہی کا کفارہ وازالہ ممکن ہے؟رہنمائی فرمائیں۔
مستفتی: ا ب ج

الجوابُ حامِدا ًو مُصلیِّا ً

مذکور L.E.D میں ضرب لگنے سے خراش آئی تھی، جوکہ وارنٹی میں شامل نہ تھی، اس کے باوجود سائل نے اسے چھپاکر اس کو تبدیل کروایاہو تو اس پر آنے والا واقعی خرچہ ڈیلر کے ذریعہ متعلقہ کمپنی تک پہنچانا لازم ہے تاکہ مؤاخذہ دنیوی واخروی سے سبکدوشی ہوسکے، اگر خود پہنچانے سے کسی کا خوف ہو تو کسی کے ذریعہ یا کمپنی کے اکاؤنٹ میں اتنی رقم جمع کرائی جاسکتی ہے۔

مأخَذُ الفَتوی

کما فی تفسیر ابن کثیر: تحت قولہ تعالٰی: (یا ایھا الذین اٰمنوا لاتاکلوا اموالکم بینکم بالباطل) ینھی تبارک وتعالٰی عبادہ المؤمنین عن ان یاکلوا اموالکم بعضھم بعضاً بالباطل، ایک نوع المکاسب التی ھی غیر شرعیۃ کانواع الربا والقمار وماجری مجری ذلک من سائر صنوف الحیل الخ (ص475)۔